MAI DE 10 MILIARDS DE PLANETAS AMB DE VIDA POSSIBLA
La sciéncia afirma que la nòstra galaxia, la Via Lactèa auriá ela soleta mai de 10 miliards de planetas ont i poiriá aver de vida. Pasmens, se son pas encara estadas descobèrtas, es pas per de rasons scientificas mas per de prejutjats umans.
Se demandam se sèm sols dins l’Univèrs, la responsa oficiala es «òc-ben». Totun, cèrts estudis recents demòstran que, s’avèm pas trapat una planeta amb de vida es pr’amor solament dels nòstres prejutjats car ignoram una granda part de las planetas ont i poiriá aver de vida potenciala, e tot aquò pr’amor de l’estela que i a près d’aquela planeta.
Car tota forma de vida pòt pas subreviure segon las condicions de calor extrèma e las radiacions que li pòdon arribar de la siá estela estant. Aital, foguèt publicat dins lo numeric internacional The Astrophysical Journal un nòu estudi qu’afirma qu’una estela nana blanca tanben poiriá aver près d’ela una planeta ont la vida se desvolopariá plan.
Totjorn de prejutjats
Perqué s’estúdian pas de cases coma aquel ? Pr’amor de los prejutjats umans. Aquò menèt a ignorar tota una longa sèria d’estelas e planetas. Car per aver de vida, cal cèrtas condicions e una d’aquestas es considerada coma primordiala: cal que l’estela del sistèma espepissat siá viva. Aiçò vòl dire que i a encara d’activitat nucleara dins lo sieu nuclèu. Lo Solelh, per exemple balha encara de calor pr’amor de la fusion nucleara encara activa en el. Es una estela viva.
Aquel fenomèn butèt fòrca cercaires a cercar pas de vida sus de planetas que fan part de sistèmas amb una estela nana blanca (mòrta). Pr’amor que, malgrat qu’encara fornisca de calor, l’estela es plan mòrta, valent a dire sens fusion nucleara.
«Las simulacions informaticas demòstran que, se i a de planetas rocosas i poiriá plan aver de vida», çò diguèt Aomawa Shields, de l’Universitat de Califòrnia. Alara, i poiriá aver mai de 10 miliards de planetas amb de possibla vida solament dins la Via Lactèa, la nòstra galaxia.
Car i a mai de 10 miliards de nanas blancas dins la Via Lactèa. Se caduna a una planeta en la siá periferia, es una planeta potenciala per aculhir de vida, çò dison los cercaires dins aquel estudi. Lo 97% de las mai de 150 miliards d’estelas que i a dins nòstra galaxia son nanas blancas. E doncas refusam de las estudiar e analisar. Pr’amor de prejutjats umans.
Segon los cercaires qu’an realizat aquel estudi, es una chifra plan importanta per la refusar. « L’environament estelar de nanas blancas, abans considerat coma inapte a la vida, ara ofrís de nòvas escasenças per trapar e estudiar d’exoplanetas que poirián aver de senhals d’astrobiologia», çò apondèt Shields.
Alara, es demostrat que los prejutjats tanben son viscuts per de scientifics que tanben son umans. Cal doncas, segon aqueles cercaires, poder tanben estudiar totes aqueles 10 miliards de sistèmas amb de nanas blancas de la Via Lactèa se volèm trabalhar corrècta per tal de cercar de vida en defòra de la Tèrra. Es vertat qu’es un trabalh gigantàs mas ara aurem mai d’escasenças de trobar vida e solament dins la Via Lactèa.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: NASA/GODDARD/CC
