A la limita orientala de l’illa de Java, en Indonesia, lo complèx volcanic d’Ijen estona de toristas e visitants pr’amor d’un paisatge gaireben unic a la natura ; de lava blava, e un lac amb d’acid mortal. Mas l’òme, la fauna e la flòra i son adaptats dempuèi fa milièrs d’ans e ara es en un equilibri dangierós que crida d’estudioses de tota la planeta pr’amor d’un fenomèn natural unic.
Lo complèx volcànic d’Ijen fa fins a 20 quilomètres e fa partida de l’arc volcanic de la Sonda en una de las regions volcanicas pus activas del mond. Lo volcan pus celèbre es lo Kawah Ljen (2.386 mètres de nautor), qu’a un cratèr situat a 2.148 m. La lava es pas blava. A de silicats e una temperatura d’entre 700ºC e 1.200ºC. La lutz es entre ròja, iranja e jauna.
Alara, perqué dison los locals que la lava es blava ? Pr’amor d’una reaccion quimia de gases de sulfur. I a fòrça sofre que sortís de resèrvas sosterranhas a mai de 600 ºC. Quand tròba oxigèn ven brutlat e produsís de dioxide de sofre. L’energia liberada arriba en d’ondadas de lutz que los umans vesèm coma blau electric.
Lo fenomèn tanben pòt èsser vist pendent la nuèch. Pendent lo jorn sonque se pòt veire de nibòls blancs e pro. Lo lac alara ven d’una color verda plan polida. Es lo biais del lac de dire qu’es toxic, car es lo cratèr pus acid de la planeta. Quand sortís a la superfícia, lo clorur d’idrogèn e lo dioxide de sofre venon acid cloridric e acid sulfuric bloses que pòdon devorar de fèrre en paucas oras. Tanben de pèl umana.
D’alumini e de fèrre
La color verda del lac ven pr’amor de la preséncia d’alumini e fèrre. La temperatura normala del lac son 40ºC a la superfícia e 90ºC prèp de las fònts termalas interioras. Los locals i trabalhan dempuèi la decada de 1960 pel sofre. Aqueste, quand ven fred es un liquide ròge amb un capa superiora jauna. Puèi de tròces del meteis son menats en bas del volcan (4 km).
Los minièrs locals alendan lo gas toxic totjorn. E lèu arriban de malautiás pulmonaras grèvas. La mejana de vida d’un trabalhaire local d’aqueste lac son aperaquí 50 ans. E tot aquò per sonque 15 dolars jornadièrs. Pasmens, al torn del volcan i a una biodiversitat de fauna e flòra excepcionala.
En bas d’aquelas montanhas i a la Resèrva de Biosfèra d’Ijen-Merapi-Maelang, amb de sèlva tropicala, leopards (Panthera pardus melas), gibons (Hylobates moloch) lo monard lutung de Java (Trachypithecus auratus) de cèrvis e singlars. Tanben i demòra prèp l’agla de Java (Nisaetus bartelsi) o lo gal de cana (Gallus varius). Al lac i demòra pas de vida. Mas prèp i an de bactèrias acidofilas.
La region a fòrça pluèja. Lo sòl es plan fertil. I a un airal, totun, ont los arbres an pas de fuèlhas pr’amor dels gases. Es la zòna mòrta. Prèp del lac tanpauc i a de plantas. Fins al sègle XXI sonque i anavan de geològs e de minièrs. Mas las rets socialas creèron una granda atraccion pels toristas. Que i montan cada nuèch per veire la celèbra lava blava.
E los minaires ara trabalhan coma guidas e guanhan mai d’argent. Mas tanben i a mai de plastic al torn de la resèrva naturala pr’amor dels toristas. Lo lac e lo volcan contunhan d’èsser estudiats pels scientifics. Las erupcions son contunhas. Es, fin finala, un ecosistèma geologic dels pus agressius del mond ont la vida trapa cada nuèch de lutz blava que remembra los primièrs jorns de la planeta.
La Redaccion
Imatge principala: Thomas Fuhrmann/CC
