DESCORBIT UN SISTÈMA SOLAR DAMB QUATE ESTELES
Es astronòms an descorbit un fenomèn fòrça estranh ; ei un sistèma solar damb quate esteles. Non hè guaire scientifics chineses descorbiren un sistèma solar damb tres esteles. Eth fenomèn ei ara donques mès complèx, pr’amor qu’a auta còla de cercaires descorbic quate sistèmes solars damb quate esteles e d’aguesti dus an esteles nanes marrones, un fenomèn fòrça estranh en espaci exterior.
Aué es astronòms an ja descorbit nanes blanques, nanes vermelhes, e esteles gigantes auriòles. Totun, e maugrat qu’es esteles nanes marrones son fòrça estranhes en Univèrs, n’ i a dos en aqueri quate sistèmes solars que son amassa damb es autes e açò ei un fenomèn fòrça estranh.
Es esteles nanes marrones son petites e hreides e semblen mès planetes que non esteles pr’amor des sues mesures. Açò ja explique se perqué son dificiles de trapar. Pr’amor que non dan guaire lutz e calor e normaument demòren amagades ena escuretat der Univèrs.
Esteles que non capiten
Es esteles nanes marrones tanben son coneishudes damb eth nom d’esteles que non capiten pr’amor que pendent eth sòn desvolopament non podèren víer granes esteles massiues, dilhèu pr’amor d’ua fauta de pro idrogèn. Normaument son acompanhades damb ua auta estela. E ara un nau estudi publicat ena revista scientifica online Monthly Notices of the Royal Astronomical Society n’a dat mès detalhs.
Es sistèmes solars an ena sua grana majoritat ua sola estela. Aguest ei tanben eth cas deth Sistèma Solar e tanben de Proxima Centauri, eth sistèma solar qu’ei situat mès a pròp de nosati. De hèt, aguest sistèma solar ei a solament 4,3 milions d’annades-lutz dera Tèrra.
Mès ara cercaires dera universitat de Nanjing an descorbit un sistèma solar damb quate esteles. Eth sistèma descorbit ei un shinhau mès lonh, pr’amor qu’ei a 82 annades-lutz dera Tèrra. Eth nom deth sistèma solar damb quate esteles ei totun dificil : UPM J1040-3551 AabBad.
Es quate esteles d’aqueth sistèma solar son fòrça apròp es unes des autes (a solament 1,67 UA o Unitats Astronomiques). Cau rebrembar qu’ua UA ei era distància entre era Tèrra e eth Solei (150 milions de quilomètres). Damb eth descorbiment d’aguest nòu sistèma solar es cercaires tanben trapèren un fenomèn fòrça singular e estranh pr’amor qu’enquiara se pensaue que non i auien sistèmes solars damb quate esteles. « Qu’ei ua escadença unica entà poder estudiar aqueth tipe de sistèmes solars, çò didec Maria cruz Gálvez-ortiz, coautora d’aguest estudi ».
Pendent er estudi d’aqueri sistèmes, es cercaires podèren tanben descorbir naues caracteristiques d’aqueres esteles ; es dues esteles nanes de dus des quate sistèmes solars ara descorbides an es mesures de Jupitèr e son entre 10 e 30 còps mès massiues qu’aqueth e an ua temperatura de superfícia 2.000 ºC mens qu’es esteles nanes vermelhes.
Totun, es astronòms non an podut encara descorbir quina ère era edat d’aqueres esteles e açò maugrat que pensen qu’an coma origina era madeisha nebulosa. Es scientifics creden que pòden auer ua edat relatiua d’entre 300 e 2.000 milions d’annades. Ara demanden poder estudiar-les damb mès prigondor entà poder aufrir ua edat mès curosa.
Era Redaccion
