La recenta analisi de l’ADN dels primièrs umans modèrnes qu’arribèron en America meridionala fa de desenas de milièrs d’ans a mostrat una populacion plan mai complèxa, amb d’umans qu’avián tanben d’ancessors pròches neandertalians e tanben denisovans, un fach inconegut fins ara.
Per ansin, l’analisi de dos individús que visquèron en Brasil (la region del nòrd-èst) fa de milièrs d’annadas, demest d’autres, a menat a divèrsas resultas estonantas pels arqueològs. A pogut èsser escricha l’istòria demografica preïstorica d’America e tanben a pogut èsser confirmada non sonque una migracion nòrd-sud mas tanplan una autra sud-nòrd a travèrs de la còsta atlantica.
A mai, foguèt descobèrta l’evidéncia d’ancessors neandertalians en diferents individús ancians d’America del Sud pel primièr còp. Aital, foguèt una conquista umana plan complèxa. D’autres encara avián d’ancessors genetics (plan mai) denisovans. Pasmens, encara demòran fòrça questions dobèrtas: fins a ont arribèron aqueles primièrs paleoindians ?
Una populacion al nivèl regional
Los individús analisats foguèron trapats a Pedra do Tubarâo e a Alcobaça, dins lo nòrd-èst brasilièr, per de cercaires de l’Universitat Atlantica de Florida e de l’Universitat d’Emory. Fins ara se sospechava que i aviá agut una migracion nòrd-sud. L’estonament venguèt màger quand se descobriguèt que tanben i aviá agut una autra granda migracion preïstorica sud-nòrd per la còsta atlantica.
Tanben s’es pogut confirmar la preséncia d’ancessors neandertalians, un tipe d’uman que visquèt en Eurasia e Africa mas pas en America, pr’amor que s’escantiguèt abans. La resulta del nòu analisi es estada publicada dins lo numeric Proceedings of the Royal Society B. Los scientifics, en mai d’aquò, an trobat qu’aqueles brasilièrs preïstorics èran tanben d’individús fòrça restacats geneticament amb Uruguai e Panamà.
“I aguèt una migracion per la còsta atlantica vèrs lo nòrd totalament inconeguda fins a uèi, çò ditz Michael DeGiorgio, que dirigiguèt la còla de cercaires. Son d’eveniments regionals que, pasmens, aurián butat un grand nombre de personas a viatjar per la còsta atlantica”. De soslinhar que los cercaires an tanben trapat de senhals genetics plan fòrts d’australasians (d’Austràlia e de Papoa-Nòva Guinèa).
En mai d’aquò, los cercaires an constatat una màger preséncia denisovana (mai encara que neandertaliana) en un grop d’individús d’Uruguai e Panamà. Fins ara degun aviá pas pensat que i aguèsson de paleoindians amb d’ancessors denisovans. “Es fantastic, çò afirma John Lindo, antropològ. La barreja aurà agut luòc fa almens 40 000 ans. Un d’aqueles individús visquèt fa sonque 1500 ans. E doncas la mescla entre nòstra espècia e de denisovans realizada fa tant de temps serà estada fenomenala pr’amor que la preséncia genetica denisovana après fòrça milièrs d’ans èra encara tras que fòrta”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
