Un dels darrièrs rapòrts de l’ÒNU es tras qu’esglasiant pr’amor que sa conclusion es òrra: la planeta Tèrra, se tot contunha aital, serà una planeta ont i poiriá aver pas pus de vida en l’an 2050. Dich d’un autre biais, los abitants de la Planeta Blava avèm sonque 30 annadas per cambiar totalament nòstra manièra de viure o serà tròp tard. Çò qu’es esglasiant, en mai de las donadas que fornís aquel rapòrt, es qu’es un rapòrt fach per de scientifics de l’organisme transnacional mai grand de la planeta.
Segon aquel rapòrt, i aurà divèrsas causas que provocaràn –o poirián provocar se i a pas cap cambiament prigond dins la societat actuala– la mòrt generalizada sus la Tèrra: la qualitat de l’aire, la fonda de glaç del Pòl Nòrd e l’espandiment dels desèrts. Tot aquò e encara d’autres faches explican perqué l’ÒNU a avisat amb aquel rapòrt que l’an 0 per la vida de la planeta serà l’an 2050 e pas pus tard.
Lo rapòrt es un estudi que l’ÒNU demandèt a diferents cercaires de la planeta e qu’a per nom “Perspectivas de la planeta” (GÈO segon sa sigla en anglés). Per far l’estudi, i participèron mai de 250 cercaires de diferents airals, e totes, malgrat lors diferéncias scientificas, confirmèron que la planeta coneisserà una creissença generala de las temperaturas qu’uèi ja pòt èsser classada entre 3 e 5 grases e aquò seriá un fach determinant a l’ora de provocar la mòrt generalizada de totes los èsser vius sus la Tèrra.
Un rapòrt elaborat pendent 6 ans
Lo rapòrt GÈO de las Nacions Unidas foguèt presentat en 2019 dins la capitala de Kenya, durant la IV Assemblada de las Nacions Unidas per l’Environament, e foguèt realizat durant 6 ans. E dins sas 800 paginas pòdon èsser descobèrtas las causas grèvas que ja uèi lo jorn poirián provocar la mòrt de nòstra planeta en sonque 30 ans.
D’autras causas que poirián provocar aquela fin serián la pollucion, la creissença sens limit rasonable de la demografia umana, la diminucion d’aiga potabla o la manca de consciéncia environamentala –çò que poiriá èsser considerada coma la causa primièra car amb aquesta i poiriá aver encara un cambiament total de nòstre biais de viure sus la planeta-. Per ansin, e segon aquel rapòrt de l’ÒNU, “l’incapacitat constanta d’adoptar de mesuras urgentas a ja una repercussion negativa e potencialament irreversibla sus las ressorsas environamentalas essencialas o la santat umana”.
Malgrat tot aquò, lo rapòrt GÈO de l’ÒNU considèra pas que i aurà una fin totala de la vida lèu sus la Tèrra pertocant l’umanitat o qu’aquò se produirà d’un biais rapid. I aurà, aquò òc, de mai en mai de resisténcia als antibiotics dins lo còrs uman e aquò finirà que provocarà la mòrt de milions de personas, çò que poiriá menar a la fin o gaireben de l’espècia umana sus la planeta en 2050.
E, totun, lo rapòrt GÈO confirma que la catastròfa encara pòt èsser arrestada e fa doncas una crida a totes lo govèrns de la planeta per metre fin a la pollucion de l’atmosfèra e, en mai d’aquò, agir per reduire de manièra draconiana lo consum de plastic. Cal demenir fins a un 40% la traça ecologica de l’espècia umana sus la planeta, çò diguèron los scientifics dins aquel rapòrt, e s’aquò se produtz pas lèu-lèu, l’umanitat reussirà a destruire lo solet ostal ont viscam: la planeta entièra. Divèrses analistas enviromentalistas se mostrèron tras qu’espantats per las conclusions del rapòrt GÈO de l’ÒNU e confirmèron qu’èra esglasiant e que caliá agir tre ara.
Un article de Christian Andreu
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
