Catalonha comencèc era reintroduccion der ibis ermitan. Eth govèrn catalan sajèc ja pendent es Jòcs Olimpics de 1992 de reintrodusir era espècia en es paluns deth Empordan mas era iniciatiua non capitèc. Ara era tòca era ei sua reintroduccion definitua segontes didec Jordi Sargatal, sercetàri der Transicion Ecologica dera Generalitat de Catalonha.
Er ibis ermitan ei ua espècia fòrça menaçada damb bères ues caracteristiques fòrça singulares ; non a peu en cap e aguest a ua color fòrça ròia. Aué es migracions des darrèrs especimèns solament se debanen pr’amor dera ajuda des umans damb ultraleugèrs. Poder reintrodusir-lo qu’ei ua des tòques de Jordi Sargatal quan arriuèc ath govèrn. Ei un projècte que poirie capitar plan e ja comencèc pendent aguesta primauera en es paluns der Empordan.
Escandilhat ara hè 300 annades
Er ibis ermitan s’escandilhèc en Euròpa ara hè 300 anndes. Encara ne demorauen bèri uns especimèns en Marròc, Síria e Turquia en sègle XXau mès sonque eth sòn elevatge en diuèrsi parcs zoologics d’Àustria e Alemanha podèc sauvar era espècia enquiara. Aué ne demòran mens de 2.000 individús.
Quan era Generalitat sajèc de reintrodusir era espècia en 1992 en Empordan non capitèc e, fin finau, siguec reintrodusit en Cadis. Ailà i a 300 individús e se pòt considerar qu’era espècia ja ei ben adapatada ar airau. Era tòca ara, damb er assag de reinroduccion der ibis ermitan en Empordan ei crear un airau mièg entre Euròpa e Cadis.
Entà poder açò hèr era Generalitat catalana contactèc damb eth govèrn andalós. Qu’ajudarà e conselharà es tecnics catalans tostemp. Eth projècte serà finançat pera Fundació Alive que signèt un acòrd damb eth govèrn catalan. En abriu ja siguec bastida ua gàbia fòrça grana entà poder aclimatar es naus especimèns ar airau nàu der Empordan. Aguest ei ena Tòrre Mornau, en Empordan, e non en Montgrí, zòna prumèr causida, pr’amor qu’ailà tanben i a ducs, predators der ibis ermitan.
Es prumèrs individús arribèren en junh d’un parc zoologic de Cadis. Son 20 audèths que demoraràn suenhadi per dos umans tostemp qu’an era tòca d’ajudar es animaus. Dempús seràn barradi ena gàbia e ailà esperaràn poder ne gésser de manèra difinitiua lèu. Dempús, ath delà, arribaràn encara 20 o 30 especimèns mès, ua operacion que se poirie debanar cada an es pròplèus ans.
Aguest espècia solament a cries un còp cada tres annades e donques segontes es cercaires solament se poirà saber se era espècia capitèc ara ora de s’adaptar ar Empordan en 5 ans. Totun es esperànces son fòrça nautes. Era espècia non pòt iuernar en centre europèu-. Pr’açò es cercaires austrians e alemanhs sajèren d’introdusir-lo en nòrd italian. Entà hèr açò utilizèren ultraleugèrs, coma mairs adoptiues.
Un ibis perdèc eth sòn grop hè annades. Solament podec trabar un aute còp es ibis deth sòn grop de Cadis dempús de demorar bèri uns dies en Empordan. Ara donques es scientifics vòlen auer ua populacion establa en Empordan. Era reintroduccion aurà tostemp es ibis susvelhadi e suenhadi. Solement atau poirà capitar era experiéncia. Pr’amor qu’es ibis an tostemps cèrta tendéncia a se n’anar cap a sòn airau nadiu.
Era Redaccion
Fotogragia principau: Len Worthingston/CC.
