Un recent estudi dirigit per l’Universitat de Cambridge provoquèt fa gaire una gigantassa discussion a la comunautta scientifica internacionala. L’analisi genetic demòstra que nòstra espècia es una mescla genetica de doas populacions ancessoras desseparadas per 1,5 milions d’ans e que tornèron a se trobar ara fa 300.000 ans.
Segon Richard Curbin, que dirigiguèt aquel estudi, “l’estudi demòstra que la nòstra origina es plan mai complèxa de çò que pensavam pr’amor que i a desparièrs grops protagonistas desseparats pendent aperaquí 1 milion d’ans e trobats tornarmai per formar l’espècia umana”.
Aital, Homo sapiens auriá sortit pas d’un sol ancessor. Ja se sap que neandertalians e denisovans se crosèron amb nòstra espècia fa 50.000 ans. Mas l’estudi genetic demòstra que la mescla de gèns es plan mai anciana. Aquela mescla se debanèt fa 300.000 ans e uèi avèm de gèns d’aquela mescla plan mai que de neandertalians o denisovans (aperaquí un 2% l’umanitat pas africana).
Lo 80% e lo 20% de nòstra espècia
Un grop desconegut es estat trobat. E balhèt fins al 80% del material genetic de nòstra espècia. L’autre grop balhèt lo 20%. Mas aqueste grop a un ròtle clau en lo desvolopament del cervèl e neuronal. Los cercaires usèron d’algoritmes per trobar de populacions ancianas. E foguèron descobrits los dos grops. Quan e com se trobèron e desseparèron. “Una d’aquelas espècias, quand se desseparèt de l’autra venguèt plan mai pichona e demorèt gaireben un milion d’ans per tornar a aver las mesuras qu’aviá abans, çò diguèt Aylwyn Scally, autor d’aquel estudi”.
Aital, nòstra espècia a los genòmas d’aquelas doas populacions. Mas los cercaires an pas podut trapar quinas espècias foguèron. «Homo erectus e Homo heidelbergensis demorèron en defòra d’Africa en aquela epòca e poirián èsser aquelas doas espècias, çò diguèron los cercaires”.
«L’imatge d’espècias que naisson dirèctament d’autras es plan simpla, çò diguèt Curbin. La mescla genetica a un ròtle clau a l’ora de definir nòvas espècias al reialme animal”. Ara cal estudiar mai aqueles gèns per trobar aquelas populacions de biais antropologic. Pr’amor qu’es una istòria plan mai complèxa de çò pensat fins ara. Per ansin, Homo sapiens sapiens aguèt un ancessor que foguèt l’ancessor de denisovans e tanben de neandertalians fa 750.000 ans. Mas son tres espècias desparièras e pas ancessoras l’una de l’autra.
La Redaccion
