PARLAR MAI D’UNA LENGA REVISCÒLA LO CERVÈL
Un nòu estudi afirma que lo multilingüisme melhora las foncions cognitivas dels enfants autistas. Los cercaires dison que lo multilingüisme tanben melhora lo cervèl dels mainatges non autistas dins d’ostals multilingües.
L’estudi es un de mai que confirma las fòrtas evidéncias cognitivas dels efièches positius del fach de parlar mai d’una lenga. Aital, lo multilingüisme melhora pas solament lo cervèl dels mainatges mas tanben pòt ajudar a reduire cèrts simptòmas e permetre de melhorar la pensada dels mainatges, autistas o non.
Lo nòu estudi foguèt realizat per l’UCLA Health (Califòrnia) e publicat dins lo numeric Autism Research: segon aqueste, los parents d’enfants autistas mas d’ostals amb mai d’una lenga confirmèron que lors filhs agissián e comprenián melhor que çò qu’èra demandat a d’autres mainatges. Se concentravan e comprenián melhor tanben las decisions dels autres. A mai, mòstravan una nivèl mai reduch de comportaments repetitius, comparats amb de mainatges d’ostals monolingües.
Mai de lengas, mens d’inibicion
“De parlar de lengas multiplas, amb o sens autisme, es restacat a una melhora inibicion, una melhor flexibilitat, e tanben una melhora capacitat de prene de decisions”, çò diguèt Lucina Addin, autora principala de l’estudi, e cercaira de UCLA Health ».
Pendent l’estudi, los cercaires trabalhèron amb mai de 100 mainatges autistas e non autistas annadits d’entre 7 e 12 ans. La majoritat parlavan espanhòl e anglés a l’ostal. Las competéncias avaloradas inclusián l’inibicion, la memòria e lo desplaçament.
Las resultas confirman que lo multilingüisme pòt ben èsser restacat a mens d’inibicion, de melhors desplaçaments e una màger presa de decision que los autres enfants. Tanben descobriguèron qu’aquò entraïnava una melhora comunicacion, mens de comportaments repetitius e una melhora perspectiva.
Segon Addin, “i pòt aver una preocupacion demest los parents d’enfants autistas que parlar mai d’una lenga poiriá provocar mai de retards del desvolopament del mainatge. Pasmens, los provaments demòstran sonque d’impactes positius a tèrme long”.
“Vesèm pas cap d’efièch negatiu se i a mai d’una lenga parlada a l’ostal, çò apondèt Addin. De parlar mai d’una lenga a l’ostal entraïna una cultura mai rica pels mainatges”. Ara la tòca es estudiar mai aquò e saber se i a de limits. E per aiçò trabalharàn amb 150 mainatges autistas e estudiaràn lors imatges cerebralas per assajar d’o comprene.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: Andy Dietler/CC.
