ERA ACADÈMIA ARANESA DAURÍS UA DELEGACION EN BARCELONA

Er Institut d’Estudis Aranesi-Acadèmia Aranesa dera Lengua Occitana daurirà eth proplèu mes d’octubre ua naua delegacion en Barcelona entà reforçar era preséncia der occitan en Catalonha. Aguesta qu’ei ua hita istorica entara lengua occitana, e pr’açò er IEA-AALO a programat tres actes ena sedença der Institut d’Estudis Catalans, lòc dera naua delegacion.

Damb aguesta naua delegacion, er IEA-AALO vò enfortir mès era preséncia dera lengua e cultura occitanes en capdau barcelonin e tanben en Catalonha tota. Aguesta naua delegacion ei considerada coma ua hita istorica pr’amor qu’atau era Acadèmia aranesa poirà ampliar es sues activitats mès enlà deth territòri aranés.

Un pas estrategic

Damb aguesta naua delegacion, qu’aurà coma sedença es installacions dera libreria der Institut d’Estudis Catalans en Barcelona (Carrèr Maria Aurèlia Campmany, 14-16),  er IEA-AALO vò espandir es sòns projèctes e tribalhs en Barcelona, ua ciutat estrategica ara ora promòir era lengua e cultura occitanes.

Enquia ara, era activitat dera Acadèmia se concentraue ena Val d’Aran, mès damb ua delegacion ena capitau catalana permeterà hèr un saut qualitatiu ena recèrca e normativizacion der aranés, pr’amor qu’aguesta lengua aurà un encastre mès ampli mès enlà deth territòri aranés.

Er objectiu ei mostrar er aranés coma ua lengua que hè part dera identitat collectiva catalana  europèa a mès d’ua realitat aranesa. Tanben facilitarà era coordinacion dirècta damb d’autes institucions nacionaus (com er Institut d’Estudis Catalans) e se poiràn establir ligams mès solids damb es sectors universitari e culturau barcelonins.

Damb aguesta naua delegacion er IEA-AALO que vò apropar as catalans es sues activitats, com era era normativizacion der aranés, era investigacion dialectologica o encara era documentacion deth sòn patrimòni immateriau. Açò tanben permetrà plaçar era lengua occitana en un lòc mès central laguens des politiques culturaus e lingüistiques de Catalonha.

Era dubertura dera delegacion de Barcelona se desplegarà en tres cites clau; era clauson deth 12au cors academic eth dijaus 18 de seteme ena Sala Pere i Joan Coromines der IEC (ja celebrada), era inauguracion dera delegacion en Sala Prat de la Riba (IEC),  eth divendres 3 d’octubre e ua session plenària dera Acadèmia, acte reservat as membres dera Acadèmia, eth dissabte 4 d’octubre.

Era Redaccion