Coma aquò foguèt confirmat fa gaire a Chornobyl, l’airal a l’entorn de la centrala nucleara japonesa de Fukushima –e que patiguèt un òrre accident nuclear en 2011- se reviscolariá. D’efièch, un nòu estudi biologic de la region a confirmat que i a ara mai d’espècias animalas qu’abans e la causa ne poiriá èsser, malgrat la radioactivitat, l’abséncia d’umans.
Segon lo nòu estudi fach per de cercaires de l’Universitat de Georgia, s’es pogut demostrar amb mai de 250 000 fòtos que dins la zòna a l’entorn de Fukushima la fauna s’es reviscolada amb mai de 20 espècias animalas, abans brica abondantas. Entre aquestas i auriá lo singlar, la lèbre japonesa, divèrsas espècias d’aucèls, lo rainard e lo raton lavaire, raras espècias dempuèi fa de temps dins la region.
L’estudi foguèt dirigit pel biològ James Basley e amb aqueste se dona de responsas a las questions scientificas sus la vida de la flora e la fauna dins aquela region dempuèi 2011. “La resulta de l’estudi confirmèt que i a de pròvas innombrablas que fòrça espècias animalas son abondosas dins la zòna d’evacuacion de Fukushima, çò afirma Beasley. Son d’espècias en concurrència amb l’espècia umana, coma lo singlar, que demostrèt sa preséncia maites còps davant las camèras”.
Aital, l’estudi a demostrat amb d’imatges que plusors espècias animalas salvatjas son ara mai abondantas dins la region, e la causa, segon los quites cercaires, ne seriá que los umans i son pas pus. Lor preséncia, totun, depend de la zòna de restriccion umana.
Tres airals desparièrs
De camèras foguèron installadas –mai de 100– dins los tres airals diferents que i a l’entorn de la centrala nucleara de Fukushima; un primièr, que i a pas cap uman pr’amor del naut nivèl de radioactivitat. Un segond airal, que los umans i pòdon intrar mas pas sovent, e qu’a un nivèl de radioactivitat mejan, e un tresen airal que i a d’umans –pas gaire – que poguèren demorar ailà car lo nivèl radioactiu es fòrça bas.
Durant mai de tres meses, las camèras confirmèron mai de 46 000 còps amb d’imatges la preséncia de singlars. D’aquestes 26 000 demostrèron que lo singlar es ara pus abondós dins l’airal ont i a pas d’umans e que n’i a sonque 13 000 dins ’airal ont encara i demòra un grop reduch d’umans. En mai de singlars las camèras enregistrèron tanben d’imatges de ratons lavaires, de martas e monards japoneses.
Totun, malgrat que se siá pogut confirmar scientificament que i a mai d’espècias qu’abans dins la zòna, se pòt pas res saber encara sus la santat d’aqueles especimèns salvatges. L’estudi tanben analisèt de factors coma la distància a Fukushima, lo temps d’activitat, la vegetacion e l’altitud del luòc.
Segon los cercaires, la conclusion es que lo nivèl d’activitat umana primièr, l’altitud del terren puèi e enfin lo tipe d’environament serián las causas de màger a mendre abondància de las diferentas espècias, mai encara que los quites nivèls de radioactivitat. A mai, divèrsas espècias cambièron de costumas: los ratons lavaires, normalament nuechencs, son ara mai actius pendent lo jorn e los singlars son fòrça mai actius en de luòcs ont i a pas d’umans qu’en de luòcs ont n’i a.
D’autras espècias coma lo seròu japonés, una sòrta d’isard salvatge, lo rainard, lo cèrvi sika e l’ors negre tanben foguèron enregistrats, un fach que confirmariá lo reviscolament de la fauna e la flòra localas 10 ans après l’accident nuclear de Fukushima. L’estudi foguèt publicat dins la revista numerica Journal of Frontiers in Ecology and the Environment.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
