L’eleccion de las reinas (femnas dels reis) es estada totjorn fòrça importanta, per l’influéncia que podián exercir suls sieus marits. Mas aquela eleccion es estada tradicionalament mai importanta quand l’eleccion èra pel marit d’una reina.
La reina Victòria d’Anglatèrra (1817 – 1901) èra una femna jove, e amb una educacion insufisenta per las siuenas foncions. Qualqu’unes prepausavan una regència, malgrat la siuena majoritat d’edat. Aprés, la jove reina demostrèt una granda capacitat per regnar (amb de fòrça foncions politicas que manteniá encara la monarquia), mas l’eleccion de marit venguèt una “question d’estat”.
Un linhatge europèu ?
Escuélher un candidat d’un autre linhatge europèu o un autre podiá significar de cambiaments en la diplomacia europèa. Foguèt fin finala escuelhut lo prince Albèrt de Saxònia-Coburg (1819 – 1861), de la familha reiala bèlga (un linhatge fòrça jove), mas d’origina alemanda. Aquel matrimòni intensificava las relacions entre Grand Bretanha e lo jove Reialme dels Bèlgas, e semblava pas que prejudiciès las relacions diplomaticas entre los desparièrs estats europèus.
A la meteissa Grand Bretanha, al començament l’opinion èra pas tròp favorabla. Las originas alemandas dels Saxònia-Coburg agradavan pas a qualques cercles politics. Lo coble, malgrat qualques desavens temporals, mantenguèt una relacion positiva e ambedós apiejavan la gestion de l’autre. Un matrimòni prolific, amb nòus filhs e una granda quantitat de felens, qu’ocupèron gaireben totes los tròns europèus.
Albèrt consacrèt totes los sieus esfòrces a defendre e apiejar la gestion de la siuena femna, mas tanben a la difusion culturala e scientifica. Venguèt lo principal promotor de la Primièra Exposicion Internacionala a Londres l’an 1851 (uèi Exposicions Universalas), que foguèt un succès, malgrat los dobtes del Parlament britanic. Moriguèt jove, amb solament quaranta dos ans, e la siuena mòrt foguèt fòrça patida per la reina Victòria.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
