Vènus aguèt una atmosfèra favorabla a la vida durant 3 miliards d’ans
La planeta Vènus, qu’uèi es un desèrt sens vida amb de temperaturas qu’atenhon los 462°C, foguèt pas totjorn aital. Una còla de cercaires de la NASA trabalhèt pendent de setmanas sus totas las donadas qu’existissián fins ara sus aquela planeta e ne tirèt una conclusion estonanta: Vènus poiriá èsser estada una planeta abitabla durant prèp de 3 miliards d’annadas.
Per ansin, pendent 3 miliards d’annadas Vènus aguèt una temperatura sufisenta per aver de vida , entre 20°C e 50°C, en mai d’un ocean prigond e d’un clima que demorèt estable. E, doncas, i poiriá aver agut de vida. Totun, fa 715 milions d’ans se debanèt quicòm que provoquèt un cambiament environamental qu’entraïnèt la desertificacion de la planeta que coneissèm uèi.
Segon la còla de la NASA que faguèt aquel estudi, dirigida per Michael Way e Anthony Del Genio, Vènus auriá tengut d’oceans d’aiga e de nívols pendent prèp de 3 miliards d’annadas. “Es sonque una ipotèsi, a l’ora d’ara, çò afirmèt Way, mas cresèm que Vènus aguèt un bon clima durant de miliards d’ans. Mas fa aperaquí 715 milions d’ans quicòm se passèt que transformèt totalament lo clima de la planeta”.
De reconstitucions informaticas
La conclusion de l’estudi es la fin d’una recèrca scientifica facha per aquela còla de la NASA amb 5 reconstitucions informaticas diferentas sus las donadas actualas sus aquela planeta. Las temperaturas se situèron demest los 20°C e los 50°C pendent de miliards d’ans. Mas la creissença del dioxid de carbòni fa entre 700 e 750 milions d’ans entraïnèt la mòrt de la planeta.
Tres d’aquelas reconstitucions confirmèron que Venus aguèt d’oceans d’aiga amb mai de 300 mètres de prigondor e que la lutz solara i arribava d’una manièra favorabla gràcias a son atmosfèra. Dempuèi ara fa 4,2 bilions d’annadas Vènus comencèt d’aver un clima mai freg.
L’episòdi qu’o cambièt tot se seriá passat fa 715 milions d’ans amb fòrça mai de nitrogèn, de dioxid de carbòni e de metan. La causa encara n’es un mistèri malgrat que los cercaires cregan qu’aquò se faguèt pr’amor d’una creissença gigantassa d’erupcions volcanicas venusianas.
“Quicòm se passèt que cambièt totalament lo clima de Vènus e entraïnèt un cambiament environamental, çò diguèt Way. Sus la Tèrra tanben an agut luòc d’episòdis parièrs coma lo de Siberia fa 500 milions d’ans, que provoquèt un escantiment de massa. Totun, lo cambiament que lo patiguèt Vènus foguèt plan mai grand”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
