Era confirmacion deth descorbiment d’ua naua espècia ominina mòstre ua diuersitat plan màger de primats pendent eth Miocèu e cambie eth nuclèu dera evolucion d’aguest grop animau ath Mediterranèu oriental.
Pr’amor que, durant decades, era origina des nòsti ancessors mès luenhans siguec tostemp Africa orientau. Siguec en païsi coma Kenia o Oganda on sigueren trapadi fossils e mès fossils qu’an permetut escríuer era istòria scientifica dera evolucion ominina. Enquiara.
Ara un nau estudi suggerís qu’es palontològs poirien auer demorat enganats en tot cercar en lòc equivocat. Un tròç de maishèra trapat en desèrt egipcian poirie hèr cambiar era istòria d’un o diuèrsi capítols dera evolcion des ominins e donques, tanben deth èsser uman.
Era naua espècia deth nòrd egipcian
Masripithecus moghraensis, ei era naua espècia de primat confirmada pes cercaires que siguec trapada en depaus de Wadi Moghra, en nòrd egipcian. Eth sòn nom que vò díder « simian d’Egipte » e demorèc ara hè entre 17 e 18 milions d’annades, pendent eth Miocèu, quan Asia e Africa començauen a unir-se.
Er estudi entà descríuer aguesta naua espècia siguec publicat ena revista scientifica internacionau online Science. Eth primat ei ua mescla de caracteristiques d’auti primats. Mès tanben ei fòrça mès apròp d’espècies modèrnes que non d’ancianes. “Ei aguesta mescla çò que situe en aguesta posicion aguesta espècia, çò didec eth paleontològ Erik Seiffert, autor principau der estudi. Era maishèra ei fòrça prigonda e fòrta e semble mès era d’espècies posteriores d’Euròpa e Asia. E tanben a eth començament d’ua crèsta en cran.
A mès d’açò trapèren molars fòrça especiaus. Eth dusau e tresau molar an ua longada semblabla e açò ei fòrça diferent de d’autes espècies de primats der èst african mès ancians. E son fòrça plans.
Aguest descorbiment ei istoric. Hè 25 milions d’annades era linha evolutiua des primats e des umans se separèc entà tostemp deth linhatge des mones deth Mon ancian. Durant eth Miocèu (hè entre ara 23 e 5 milions d’anndes) es mones èren plan mès diuèrses e eth sòn abitat ère fòrça mès gran.
Segontes mès d’un cercaire estudiar espècies mès recentes (com ara es australopitecins) sonque ajude a bastir era istòria mès recenta deth linhatge uman. Se òm vò comprene eth passat mès luenhan cau cercar eth darrèr ancessor comun de chimpanzés e umans. E açò poirie èster eth començament reau dera evolucion umana. E aué açò encara non ei coneishut.
Era importància deth descorbiment de Masripithecus moghraensis ei eth lòc on siguec trapat. Enquiara era mapa dera evolucion ominina non demoraue en un desèrt ued. Mès hè 17 milions d’annades er ecosistèma locau èrea fòrça diferent. Diden es paleontològs qu’es fossils deth Wadi Moghra demorèren en un depaus situat a pròp dera còsta mediterranèa, o i auien paluns e bòsqui d’aigua doça fòrça diferents der Egipte actuau.
Es cercaires estudièren mès de 268 caractèrs morfologics e 59.000 bases genetiques de Masripithecus. Eth resultat ei poder situar aguest primat com era espècia mès prèpa des umans. Çò ei eth darrèr ancessor des primats modèrns (damb es gibons e es umans). E açò ei fòrça important.
Er estudi confirme qu’es grans primats poirien auer era sua origina en nòrd-èst d’Afro-Arabia, ua region qu’includís eth nòrd african mès tanben eth Levant e eth mediterranèu orientau. D’acíu aguesta espècia aurie començat a espandir-se vèrs Eurasia.
Sigueren donques es paleontològs enganadi durant decades pr’amor deth lòc on cercauen ? Dengun pensaue trapar fossils d’ua espècia petita d’ominin ena isla de Flores, en Indonesia. Ara es rèstes de Masripithecus confirmen que non cau cercar tostemp en madeish lòc e que cau auer ua vision fòrça mès ampla.
Maugrat tot açò, es cercaires demanen prudéncia. Cau trapar mès fossils en airau entà poder cambiar era pensada scientifica tradicionau. Er arbe dera evolucion ei encara misteriós maugrat que fòrça mens qu’abans.
Era Redaccion
Fotografia principau: Sapiéncia/Chat GPT
