Fa gaire, se saupèt que lo govèrn de Nigèr voliá reduire mai de la mitat de la resèrva naturala mai granda d’Africa. La causa n’èra la demanda de l’entrepresa petrolièra chinesa CNPC de far mai d’exploracions petrolièras sul terren. E, per ansin, la Resèrva Nacionala Naturala de Termit e Tin Touma, la pus granda d’aquel continent, se poiriá reduire lèu de mai de 450 000 km2, al luòc ont i a mai de biodiversitat.
Aquela resèrva foguèt creada sonque en l’an 2012 e ja poiriá veire reducha la mitat de son territòri, segon çò que confirmèt lo quite govèrn nigerin en junh de 2020. La resèrva mesura mai de 100 000 km2 (çò qu’es aperaquí la superfícia d’Islàndia) de desèrt, mas tanben de puèges e d’autres païsatges. Lo luòc foguèt classificat coma Patrimòni Mondial per l’UNÈSCO pr’amor de sa gigantassa diversitat, car lo païsatge se devesís entre de montanhas, de vals, de prats, un desèrt e una mar de sabla. En mai d’aquò, i demòran doas de las espècias d’antilòps africans pus menaçadas: l’addax e la gasèla dama.
Una proposicion estonanta
Segon Sébastien Pinchon, director de l’ONG Noé, que dirigís, a l’ora d’ara, l’administracion d’aquela resèrva naturala, la decision governamentala nigerina èra pas brica esperada, après recebre la direccion e administracion de la resèrva solament en 2018. “Es estonant, çò diguèt Pinchon. Avèm sonque començat d’administrar aquesta resèrva, en bastissent d’edificis, logant de veïculs e demandant a la populacion locala de venir trabalhar a Termit e Tin Toumma. Es pas de creire”.
Segon aquela ONG environamentala, la resèrva es unica dins tota la region del Sahara mas tanben del Sahèl pr’amor que sa fauna es tras que rica e que lo luòc jamai non foguèt vesitat abans per l’èsser uman. Pasmens, dempuèi que l’entrepresa petrolièra chinesa CNPC entamenèt l’exploracion de la region, la populacion locala d’addaxes comencèt de davalar e uèi es plan menaçada.
En mai d’aquò, arribèron tanben d’autres problèmas per la fauna de la resèrva: d’animals empoisonats, d’aucèls mòrts prèp de bastissas d’aquela entrepresa, mai de braconatge illegal, d’arbres copats e fòrça mens d’aiga dins las fonts, un perilh gigantàs pels addaxes que demòran al luòc.
Segon divèrsas fònts ecologistas, l’ataca environamentala que la pòt patir la Resèrva Nacionala Naturala de Termit e Tin Toumma de Nigèr pr’amor de las entrepresas petrolièras chinesas poiriá dobrir la pòrta uèi a d’autras agressions contra d’autres airals africans, car demostrariá qu’una entrepresa chinesa pòt far coma vòl e amb l’ajuda governamentala africana e sonque en escambi d’argent. E doncas aquò seriá una nòva epòca en Africa (marrida), per l’environament, la fauna e la flòra d’aquel continent.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
