Un nòu estonant estudi a demostrat que fins al 75% de las naus de pesca industrialas dison pas jamai ont son. E sonque se pòt conéisser la lor posicion amb l’ajuda d’una IA o de satellits. Aquò a fòrça ajudat a melhor identificar la posicion dels vaissèls industrials actuals dins los oceans. E la resulta es escandalosa.
Amb l’ajuda del sit internet Global Fishing Watch (que comencèt sonque en 2016) podèm conéisser la posicion de mai de 65 000 naviris de pesca industrials sus la nòstra planeta. Aquò es possible pr’amor qu’an un sistèma de localizacion automatic. Mas pas totes los vaissèls industrials de pesca n’an a l’ora d’ara.
E perqué o susvelhar ?
Pr’amor que mai del 75% de las naus de pesca industrials actuals dison pas jamai ont realizan las lors activitats. Un estudi recent demòstra que mai del 75% d’aqueles batèls an pas aquel sistèma de localizacion automatic o pretendon que fonciona pas e, aital, las autoritats de cap de govèrn mondial pòdon pas saber d’ont es originària la pesca. E sonque lo 25% d’aqueles vaissèls indican totjorn ont son exactament.
Una analisi facha amb ajuda d’una IA
Dins l’estudi, publicat dins lo numeric Nature, los cercaires demòstran qu’es parièr amb los naviris de transpòrt. S’analisèt mai de 2 milions de donadas d’imatges de vaissèls de pesca de tota la planeta entre los ans 2017 e 2021. Pr’amor qu’ara, amb l’ajuda d’una IA, se pòt plan identificar plan un batèl de pesca dins l’ocean.
Las donadas mòstran que, de cada dètz vaissèls de pesca, sèt pescan en Asia, e sonque un en Euròpa. Pasmens, las donadas publicas afirman que la pesca dins totes dos continents es gaireben parièra. Lo meteis estudi tanben confirma que i a de mai en mai d’esplecha marina de l’energia.
Pendent aquelas annadas, las estructuras petrolièras cresquèron de fins a un 16%. E i a mai del doble de plataformas eolianas en mar qu’abans. E fins a nòu còps mai sus la còsta de China. « L’Antropocèn a pas per limit la Tèrra continentala, çò soslinha Patrick Halpin, ecològ de l’Universitat de Duke. D’aver una vision entièra de l’industrializacion marina ajuda a comprene cossí creisson l’energia eoliana marina, l’aqüacultura e l’esplecha minièra dels oceans coma tanben la pesca industriala e lo transpòrt marin ».
Segon los cercaires d’aquel estudi, los oceans del Mond son uèi un espaci de trabalh industrial ja envasit pels umans que demòstra que i a una economia marina cada jorn màger. Es per aquò que los cercaires assolidan que los estudis coma aquel ajudan fòrça comprene l’activitat umana negativa en mar per tal de melhor protegir los ecosistèmas marins.
Un article de Christian Andreu
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
