Totes avèm ausit aquestes darrièrs meses que las personas de nòstre entorn son ara plan mai colericas qu’abans la pandemia. Segon lo vejaire de la majoritat, aquò seriá sonque una ipotèsi. Mas dins de païses coma los Estats Units se comencèt ja de far d’estudis per assajar de comprene s’aquò es vertat o non. E la resulta dels primièrs estudis sus aquel fenomèn es estonanta.
Es doncas possible se demandar se la pandemia a cambiat lo caractèr de las gents. Divèrses estudis estatsunidencs avián ja confirmat que i aviá de cambiaments de caractèr puèi que lo mond èran mens agradius e mens dobèrts qu’abans. Aquò es possible?
Segon un recent estudi, la pandemia auriá ben cambiat lo caractèr dels mai joves, almens als Estats Units, mentre que la majoritat dels scientifics creson mai a l’ipotèsi que ditz que la pression environamentala càmbia pas lo caractèr d’una persona. Totun, aital es la resulta d’un nòu estudi publicat dins lo numeric PLOS One e realizat per una còla de cercaires dirigida per Angelina Sutin, de l’Universitat de l’estat de Florida.
Una pandemia excepcionala
D’estudis anteriors avián coma resulta que se pòt pas restacar la pression environamentala coma de tèrratrems o encara d’oragans a de cambiaments de personalitat. Mas la pandemia de la covid-19 ne seriá una bèla excepcion, pr’amor qu’auriá provocat mai d’un cambiament del caractèr dels joves en general.
D’efièch, dins lo nòu estudi, e après estudiar las donadas de mai de 7.109 personas, se comparèt los caractèrs dels participants amb de donadas d’entre 2014 e 2020. Per ansin, mai de 2,62 traches del caractèr dels participants poguèron èsser analisats. Dels participants, lo 41,2% èran d’òmes e l’edat minimala per participar èra 18 ans.
La resulta es que i aguèt pas gaire de cambiaments de personalitat, franc del neuroticisme dels participants –que venguèt mendre-. Aquel trach fa referència a l’inseguretat emocionala e l’ànsia. Totun, es soslinhat que los nivèls d’extraversion, èsser mai dobèrt o encara agradiu, demesiguèron tanben, comparats amb l’epòca anteriora a la pandemia de la covid-19.
Aqueles cambiaments son estats qualificats de pichons, e plan moderats, malgrat que la resulta ne pòsca èsser “del mai jove, del mai neurotic”. Los d’una edat mai avançada, per contra, an mostrat de cambiaments mens aguts. Los mai vièlhs an pas presentat gaireben cap de cambiament de personalitat. Pasmens, los cercaires vòlon soslinhar que se la pandemia foguèsse estada pus longa, los cambiaments de caractèr de los participants serián estats pus grèus, mai que mai entre los joves.
“ I aguèt pas gaire de cambiaments de caractèr amb la pandemia de la covid-19, çò dison los cercaires-. Los mai joves son los que cambièron mai, e ara son mai neurotics, mens agradius e vòlon pas res pus saber sus la situacion actuala de la planeta. E aquò fan venir los joves mai estransinats, mens cooperatius e plan mens responsables”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
