Es conegut que los oceans de la planeta absorbisson la majoritat del CO2 contengut dins l’atmosfèra terrèstra. Pasmens, malgrat qu’aqueste procès aja durat de milions d’annadas, ara los scientifics avertisson que la mar poiriá cessar d’assimilar de gas carbonic en causa del cambiament climatic que lo patís uèi la Tèrra. Segon los cercaires, lo limit per que la mar pòsca contunhar son assimilacion del CO2 poiriá arribar lèu, çò que provocariá que l’ocean venguèsse, a son torn, un nòu emeteire de gas carbonic, e que la temperatura globala aumentèsse encara considerablament.
La mar a absorbit de CO2 dempuèi abans la revolucion industriala. Uèi, mai del 90% del gas carbonic que lo produtz l’activitat umana actuala es encara assimilat pels oceans e s’i dissòlv. Mas ara los scientifics alèrtan que lo nivèl de CO2 present dins l’atmosfèra de la planeta es gigantàs, e que, e mai la superfícia oceanica absorbisca totjorn que mai de CO2, ela tanben patís de cambiaments coma l’acidificacion o de temperaturas mai nautas.
E coma o soslinhan cèrtas donadas d’estudis recents, l’equilibri entre lo nivèl de CO2 e sa capacitat d’absorcion dins los oceans seriá pròche de sa fin pr’amor que la mar poiriá pas pus assimilar de CO2 al nivèl mondial. Aquò seriá una catastròfa per l’umanitat car lo nivèl de CO2 dins l’atmosfèra poiriá passar a 600 parts per milion, valent a dire un 50% de mai que las 410 parts per milion registradas en 2019. Aquò tanben provocariá una creissença rapida de la temperatura mondiala de mai de 2 grases.
Pr’amor de tot aquò l’UNÈSCO a començat de far un estudi prigondit sus l’equilibri entre lo CO2 present dins l’atmosfèra e la capacitat qu’an los oceans de la planeta per l’absorbir. Segon aquel organisme, cal far ara, mai que jamai, aquel nòu estudi, car las emissions de CO2 actualas dins l’atmosfèra son las pus grandas jamai produchas per nòstra espècia. E cal poder balhar un rapòrt entièr e prigond als govèrns de nòstra planeta per analisar cossí melhorar la lucha contra aquel cambiament environamental que seriá una vertadièra catastròfa per tota la Tèrra.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
