Malgrat que la majoritat de las bacterias sián pas dangeirosas per nòstra espècia, gaireben 8 milions de persones morisson cada an sus la planeta en causa d’elas. E se totas son pas mortalas, pòdon provocar de malautiás plan grèvas. Uèi per uèi, ja causan mai de mòrts dins lo Mond que lo tabac. La chifra es la resulta del darrièr estudi de Global Burden of Antimicrobial Resistance.
En mai d’aquò, dins lo Mond i a agut mai de 13,7 milions de personas victimas de malautiás causadas per de bacterias. Entre aquelas personas, gaireben 8 milions son mòrtas pr’amor de 33 patogèns bacterians que resistisson a la medecina antimicrobiana. Dins aquel grop tanben i a de malautiás coma la sida. De remembrar que la majoritat d’aquelas mòrts provenon de l’estafilocòc daurat (S. aureus), una de las bacterias pus dangeirosas de tota la planeta e qu’a provocat lo decès de mai d’1,1 milion de personas.
Una lista longa
Se volèm far una lista de las bacterias pus perilhosas per nòstra espècia, cal començar amb S. aureus, principal patogèn que provòca d’infeccions de la pèl. Sa transmission es tactila. Puèi ven lo colibacil (E. coli) que provòca de grandas dolors dins l’estomac e de grèvas diarrèas. L’infeccion pòt venir per l’aiga o la malnutricion.
Lo pneumocòc (Streptococcus pneumoniae) pòt menar a una pneumonia grèva e diferentas infeccions de la sang. D’autre caire, tanben i a Klebsiella pneumoniae, que provòca de grèvas malautiás de la sang e tanben de meningitis. La cinquena bacteria pus dangeirosa per l’òme, segon una lista recenta, seriá Pseudomonas aeruginosa, que demòra en d’aigas sosterranhas e arriba totjorn per l’aiga.
Sonque aquelas cinc bacterias son estadas las responsablas del decès del 54,9 % de totas las victimas mortalas d’infeccions bacterianas. La mortalitat tanben es diferenta segon la region. Aital, la region de l’Africa negra a una taxa de 230 mòrts per 100 000 abitants pr’amor de patogèns bacterians. Segon plusors cercaires, las bacterias començan de venir resistentas a la medecina actuala e ja son conegudas coma superbacterias.
Es per aquò que fòrça cercaires, ara, demandan d’estudiar mai e melhor aquel mond e d’assajar de comprene cossí las bacterias pòdon venir una menaça globala per l’umanitat. Pr’amor que uèi ja son la menaça pus granda que la patís nòstra espècia. Segon mai d’un cercaire, d’estudiar lo nombre final de mòrts per infeccions bacterianas pòt ajudar a salvar de vidas dins lo dich Tèrç Mond per arrestar una creissença encara màger de las malautiás d’aquel tipe.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
