L’OXIGÈN AJUDÈT LOS DINOSAURES A CRÉISSER
Una còla de paleontològs de l’Institut Basin de Newark, als Estats Units, confirmèt cossí cresquèron los dinosaures fa ara 215 milions d’ans en America del Nòrd. Amb l’usatge d’una nòva tecnica per analisar de gas situat dins lo replanat de Colorado e lo bacin de Newark, confirmèron que los nivèls d’oxigèn de l’epòca, tras que nauts en comparason amb uèi lo jorn, serián la causa dirècta de la creissença dels dinosaures e lor rapid espandiment per l’America del Nòrd primièr e puèi per tota la planeta.
“Divèrsas pèiras e ròcas del replanat de Colorado e del bacin de Newark, çò diguèt Morgan Schaller, autor de l’estudi, e situadas a l’epòca a mai de 1000 quilomètres de la còsta del continent de Pangèa, confirmèron que, pendent un periòde d’aperaquí 3 milions d’ans, los nivèls d’oxigèn foguèron entre un 15% e un 21% mai nauts que los de l’atmosfèra actuala”.
En mai d’aquò, los scientifics confirmèron una casuda dels nivèls de dioxid de carbòni pendent la meteissa epòca e aquò, çò diguèron los cercaires, poiriá èsser estat la causa d’un cambiament environamental radical qu’entraïnèt tanben de cambiaments biologics dins los dinosaures.
Los primièrs dinosaures
Segon aquels antropològs, foguèt pendent aquela meteissa epòca que nasquèt lo primièr dinosaure dins las forèsts tropicalas d’America del Nòrd, Chindesaurus. Pauc puèi, arribèron los sauropòdes. Malgrat aquò, los scientifics volguèron pas confirmar s’aquò aviá per causa dirècta un cambiament environamental global o se solament o foguèt a causa dels nivèls d’oxigèn.
“Çò que podèm confirmar es que lo cambiament environamental que se tenguèt fa 215 milions d’ans ajudèt plan a la diversificacion evolutiva dels dinosaures e que los nauts nivèls d’oxigèn serián una causa dirècta mas pas la soleta causa d’aquò, çò diguèt Schaller”.
Segon lo professor Mike Benton, de l’Universitat de Bristol, los primièrs dinosaures que i aguèt en America del Nòrd, pendent l’edat triassica, foguèron de mai en mai grands pr’amor dels nauts nivèls d’oxigèn. E aquel estudi demòstra que, pendent aquela epòca, la creissença dels nivèls d’oxigèn pendent tant de temps seriá una causa de mai que los auriá ajudats a créisser. Pauc puèi, fa 232 milions d’ans, los dinosaures èran ja arribats en America del Sud. L’estudi foguèt presentat dins la Conferéncia Goldschmidt 2019 a Barcelona, en Catalonha.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
