Es estada classada una nòva espècia de pterosaure
Las montanhas canadianas d’Alberta an balhat mai d’una espècia de dinosaure e pterosaure pendent las darrièras decadas. Ongan foguèt classada una espècia de pterosaure coma nòva. Son nom es Cryodrakon boreas, que demorèt al Cretacèu amb d’alas de fins a 10 mètres de longor.
Aital, Cryodrakon boreas visquèt ara fa 77 milions d’annadas e foguèt classat coma un reptil volador apertenent a la familha dels Azhdarquids, un tipe de pterosaure que i aguèt durant l’epòca finala del Cretacèu. Lo fossil foguèt trapat fa 30 ans mas es ara que foguèt classat coma una espècia nòva.
Per ansin, los paleontològs avián cregut que la sieuna esqueleta fossila (una partida de las alas, patas, còl e una costèla) aperteniá a la celèbra espècia de Quetzalcoatlus, mas ara foguèt confirmat qu’èra una espècia de pterosaure diferenta e que tanben foguèt una de las pus grandas d’aquela epòca.
“Es una descobèrta estonanta pr’amor que ja aviam lo fossil, mas ara poguèrem confirmar qu’es una azhdarquid diferent, çò diguèt David Hone, de l’Escòla de Biologia e Quimia de l’Universitat Queen Mary de Londres. A mai d’aquò, es una espècia de pterosaure que se tròba pas sovent”.
Pr’amor d’açò los paleontològs se mostrèron uroses car la majoritat de las espècias trapadas fins a uèi lo jorn son classadas amb solament un os e pro. Mas Cryodrakon es un pterosaure qu’a una esqueleta parciala e l’informacion que los paleontològs poguèren n’aver es pro granda: d’anatomia, cossí volava e cossí visquèt.
Un pterosaure predator
Segon aquela informacion Cryodrakon foguèt un pterosaure predator, que caçava de pichons sauris e mamifèrs e tanben pichons dinosaures.” Son lo grop de pterosaures mai grands de l’epòca. Lor anatomia confirma las limitas de vòl, çò diguèt Michael Habid, de l’Institut de Dinosaures del Comtat de Los Angeles. Totun, que podèm confirmar que podián volar grandas distàncias e encara crosar totalament l’ocean. Lo classament de la nòva espècia de pterosaure foguèt publicat al numeric Journal of Vertebrate Paleontology.
La Redaccion
