LOS SUPERPREDATORS EN AUSTRÀLIA FOGUÈRON LOS MEGARAPTORS
Una còla de paleontològs ven de descobrir un tipe de predator amb d’arpas gigantescas. La descobèrta poiriá provocar de cambiaments dins l’istòria de l’evolucion de la planeta pr’amor que cambiariá la plaça dels raptors dins l’environament; aquestes serián estats de superpredators e pas solament de pichons predators –comparats amb d’autres predators màgers–. Los fossils son estats trobats en Austràlia.
Aital, los fossils foguèron trapats sus la còsta de l’estat australian de Victòria. N’i a divèrsas espècias, dont un megaraptor e una espècia predatritz nòva en territòri australian : carcarodontosaurus. La trobalha permet de questionar la ierarquia dels predators pendent l’epòca cretacèa, e balha una nòva vision sus l’evolucion dels dinosaures dins l’emisfèri sud.
Cal imaginar lo continent australian fa mai de 120 milions d’ans. Alara, èra près d’Antartida e i aviá de selvas prigondas amb de dinosaures coma carcarodontosaurus, un dels màgers predators que i aguèsse mai a aquela epòca. Mas la descobèrta recenta de cèrts fossils confirmariá que, pasmens, los megaraptors serián estats los superpredators en Austràlia e non pas l’espècia de carcarodontosaurus, qu’auriá jogat un ròtle mendre.
Una nòva linha evolutiva
Segon aquela descobèrta paleontologica, la nòstra compreneson de l’evolucion dels dinosaures pendent lo Cretacèu seriá ara desparièra, e soslinhariá las diferéncias evolutivas dels predators e de la fauna generala segon lo continent. Las universitats de Victòria e de Monash an doncas confirmat que « fa 120 milions d’ans Austràlia èra plan desparièra. Èra situada plan pròcha del cercle polar antartic e aviá de grands bòsques amb de dinosaures plan adaptats a cèrtas condicions de vida singularas. Fins ara se pensava que los carcarodontosaurids o d’autres predators gigants coma T. rex èran en naut de la cadena alimentària. Mas semblariá qu’aquò se passèt solament en qualques luòcs de l’ancian supercontinent Gondwana, coma l’America meridionala ».
L’estudi realizat per aquelas universitats foguèt publicat dins lo numeric internacional Journal of Vertebrate Paleontology, e questiona aquela ierarquia. Los fossils trobats sus la còsta de Victòria confirman que los megaraptors foguèron en realitat de superpredators, los màgers que i aguèsse jamai en Austràlia. E los autres predators joguèron sonque un ròtle segondari.
Los cinc fossils trobats ara an per origina doas formacions geologicas ; Strzelecki e Eumeralla. Ambedoas formacions son dins lo sud-èst australian e a l’epòca èran plan près del cercle antartic amb de grandas selvas e diferentas espècias de dinosaures erbivòrs mas tanben carnivòrs.
Los predators gigants
Los carcarodontosaurids contrarotlavan l’America del Sud amb d’especimens qu’atenhián los 13 mètres de longor. En Austràlia, i aviá sonque d’individús de fins a 4 mètres de long, e lo sieu ròtle èra puslèu oportunista. Aquò suggerís que l’environament ajudava pas las espècias de predators a èsser gigantesques, benlèu pr’amor de cèrts limits alimentaris o d’autras pressions ecologicas.
« Los megaraptors fasián entre 6 e 7 mètres de long. Ocupavan la pus nauta plaça de la cadena alimentària car los carcarodontosaurids èran mai pichons, çò diguèt Jake Kotevski, autor d’un nòu estudi sus aqueles dinosaures. Los megaraptors èran los superpredators ».
Los megaraptors avián de pautas posterioras plan robustas e d’arpas longas e una estrategia de caça desparièra de la dels carcarodontosaurids. Caliá capturar las predas de dimensions mejanas amb los braces. Tanben i aviá de pichons dinosaures sonats unenlagiins que fasián un mètre de long e qu’èran de la familha dels velociraptors.
Lo nòu estudi suggerís que, fa 120 milions d’annadas, aqueles especimens foguèron l’origina d’autres predators posteriors. E aquò fa pausar mai de questions. I aguèt d’escambis de fauna entre l’America meridionala e Austràlia al Cretacèu inferior. Ambedós continents fasián part del supercontinent Gondwana. Los carcarodontosaurids aurián migrat en Austràlia de l’America meridionala estant en tot traversar Antartida. «I aviá d’espècias comunas de dinosaures e aquò vòl dire que i aguèt un pont terrèstre que traversava Antartida a l’epòca», çò diguèt Thomas Rich, de l’Institut de Recèrca del Musèu de Victòria.
Doncas, i aguèt pas d’isolament continental d’espècias? La vertat es que i aguèt de ponts ecologics. E durèron de milions d’ans. Los fossils de carcarodontosaurids descobèrts fa gaire demorèron a aquel endrech almens durant 10 milions d’ans. E se los megaraptorids èran de superpredators, benlèu la lor origina es australiana. E lo grop nasquèt ailà abans de migrar dins d’autres continents. Es un cas unic al Mond. «Cada nòva descobèrta fa venir la vision de la reconstitucion dels ancians ecosistèmas un pauc mai reala», çò apondèt Kotevski.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principau: Пётр Меньшиков_CC
