Totes los organismes de la planeta son, a l’ora d’ara, a mand de s’adaptar al cambiament climatic que patís la planeta. Las bacterias tanben e aquò seriá dangierós pel clima pr’amor que, a mai temperatura, mai dioxid de carbòni daissan, car cal una melhor regulacion de son mecanisme per alendar. Per ansin, lo rescaufament planetari poiriá entraïnar lèu mai temperatura car son los organismes mai abundants de la planeta.
Las bacterias, tanben conegudas coma procariotas, son a totes los continents e son gaireben la mitat de la biomassa globala. La majoritat alenda en tot daissar dioxid de carbòni, cossí fan los mamifèrs quand alendan. E la quantitat de dioxid de carbòni que pòdon expulsar es restacat dirèctament amb la temperatura. E fins ara los divèrses estudis scientifics sul cambiament climatic comptavan pas amb aquel fach.
Ara, una còla de cercaires del Collègi Imperial de Londres analizèt cossí alendan fins a 482 procairotas diferentas e trobèron que la majoritat d’aquelas expulsan mai dioxid de carbòni quand la temperatura es pus nauta. Un fach gaire conegut e que poiriá aver una influéncia dangierosa al moment actual pr’amor del cambiament climatic.
“Se pòt debanar pendent oras o jorns, çò diguèt Samraat Pawar, del Departament de Sciéncias Vivas d’aquel collègi. Mas la majoritat produsisson mai de dioxid de carbòni segon la temperatura es pus nauta. Totun, que i a una limita e quand s’es passada lor metabolisme cambia pas pus”.
Un cambiament metabolic rapid
Segon aqueles cercaires, lo cambiament metabolic de las bacterias se pòt desvolopar lèu car devon s’adaptar a de temperaturas pus nautas. Per ansin, mai temperatura qu’aurà la planeta mai oxid de carbòni que produsiràn las bacterias per s’adaptar al cambiament climatic e aquò entraïnarà, al còp, una temperatura globala pus nauta.
Los scientifics estudièron de donadas de divèrsas procariotas que vivon demèst 0º e 120º. La majoritat, çò es aquelas bacterias que demòran en d’environaments qu’an una temperatura menor als 45º cambian lor sistèma per alendar en un periòde de jorns o setmanas. Las que vivon en d’autres environaments pus rufes o fan pas pr’amor que ja o faguèron abans e la creissença de la temperatura a pas d’influéncia sus elas.
Segon aquò, la responsa de las procariotas a cuèrt termini es mai grand que en çò dels organismes eucariotas (çò es plantas, campairòls e animals). Lo cambiament de lor metabolisme foguèt demostrat de manièra matematica e poguèt èsser confirmat qu’a mai temperatura ,mai produccion de dioxid de carbòni.
“La majoritat dels modèls climatics faches fins a auèi, çò diguèt Thomas Smith, que dirigiguèt aquel nòu estudi, afirman que quand i a un cambiament de temperatura pr’amor de causas climaticas los sistèma d’alendament de totes los organismes càmbia pas. Es pas aital. Las bacterias o fan e contribuïsson al nivèl de dioxid de carbòni. Ara çò que cal es estudiar cossí pòdon arribar a cambiar lo clima las procariotas”. L’estudi foguèt publicat al numeric Nature Communications.
La Redaccion
