L’Itaca d’Ulisses, es possible que foguèsse pas jamai una illa com ditz Omèr ? Ara los expèrts dobtan sus una afirmacion qu’a sègles. Fins ara quand òm legissiá l’Odissèa d’Omèr (la melhor version occitana actuala es publicada per l’Institut d’Astudis Aranesi amb una revirada magnifica) los legeires avián totjorn imaginat Itaca coma una illa, l’illa qu’Ulisses demorèt mai de dètz ans per arribar. Segon dison qualcunes cercaires èra una peninsula de l’illa màger grèga (e plan pròcha) de Cefalonia.
Ara, dos estudioses afirman qu’aquò es una idèa marrida pr’amor qu’Itaca foguèt una peninsula de l’illa de Cefalonia. Los cercaires qu’aquò an estudiat son James Diggle, de l’Universitat de Cambridge e John Underhill, de l’Universitat d’Aberdeen e afirman qu’Itaca jamai foguèt nomenada illa per Omèr.
Lo poèta descriguèt Itaca coma tèrra, tèrra nativa e domeni mas en verses que suggerissián qu’al torn i aviá mar. Pr’açò los cercaires dison qu’Omèr aguèt fòrça escasenças per nomenar Itaca coma illa mas qu’o faguèt pas jamai.
Una tèrra o una region
Los cercaires afirman que, « en luòc d’usar la paraula illa (νῆσος/nisos), Òmer, la descriguèt coma tèrra (γαῖα/gaia), ‘tèrra nativa’ (πατρίς/patris, πατρὶςαἶα/γαῖα/patrisgaia), o ‘país/region/airal/domeni’ (δῆμος’/dimos) e mai quan νῆσος/nisos (illa) es una paraula que pòt èsser plan utilizada en mètres dactics o examètres poetics».
Per ansin, segon aquestes cercaires britanics, Omèr usèt fòrça còps l’expression ‘δῆμος d’Ítaca‘ (dimos d’Itaca) que vòl dire lo domeni d’Itaca mas que vòl pas dire illa. E lo legeire pòt comprene que se parla d’Itaca coma d’una illa, quan en realitat se parla d’un domeni. Un domeni ont i a una badiá (Forcis). Aquò, segon los cercaires vòl dire plan qu’Itaca « forma part d’una illa quand i arriba lo vaissèl ». Pels cercaires, aquesta illa es Cefalonia, mai encara quand la meteissa Odissèa confirma qu’Ulisses tanben èra lo senhor de Paliki, en Cefalonia occidentala.
Ja en 2005 Robert Bittlestone prepausèt pel primièr còp quu’Itaca podiá plan èsser restacada amb la badiá de Paliki de Cefalonia, una peninsula orientada vèrs l’oèst e plan pròcha a d’autras illas nomenadas a l’Odissèa. « Mas aquò, çò diguèt lo cercaire, es una descripcion pas reala de l’Itaca actuala, car es una illa amb de montanhas e plan orientada vèrs l’èst ».
Se aquò foguèsse vertat, Paliki seriá estada una vertadièra illa durant l’edat del Bronze, desseparada de cefalonia per un canal. Underhill estudièt geologicamnet Paliki pendent mai de 20 ans e descobriguèt que lo canal jamai existiguèt.
Ara doncas, la recèrca geologica e la filologica dison çò de meteis. D’excavacions recentas a Paliki an balhat d’espròvas qu’Itaca foguèt plan importanta pendent l’edat del Bronze. «Es una explica qu’amassa geosciéncia, Omèr e encara Estrabon, çò es dire, que Paliki es l’Itaca d’Omèr, çò diguèron los cercaires ». L’estudi foguèt publicat al numeric Antigone.
La Redaccion
Imatge principala: auteur/CC
