Aué i a fòrça cercaires – mès e mès – que pensen qu’er Univèrs ei un procés computacionau. Un d’aqueri qu’ei eth fisic Melvin Vopson, dera Universitat de Portsmouth, en Anglatèrra. E ara afirme qu’era gravetat ei era resulta d’un procés de calcul en Univèrs. Que cau pensar ena gravetat coma quicòm que passe quan er Univèrs vòu demorar organizat, mès que non un efècte fisic e pro. Pr’amor que i aurie era escadença qu’er Univèrs siguèsse de natura informatiua.
Aguest pensament arribèc dera Fisica dera Informacion. E suggerís qu’era realitat fisica der Univèrs ei en realitat compausada d’informacions estructurades. Segontes Vopson, i a cèrts descorbiments recents que confirmen qu’era gravetat o era fòrça gravitacionau ei era resulta d’un procés computacionau en Univèrs.
Un ensag d’organizacion
Segontes Vopson, era gravetat poirie èster en realitat causada pr’amor qu’ei era manèra com era informacion sus era matèria ei organizada en Univèrs. Se usam era dusau lei dera dinamica dera informacion, era matèria e es objèctes que i a en espaci pòden èster tirats amassa pr’amor qu’er Univèrs saja d’auer era informacion ordenada e comprimida.
“Descorbiguèri qu’er Univèrs poirie foncionar com un gran ordinador, un ordinador gigant, e qu’era nòsta realitat poirie èster simulada, fausa, çò didec Vopson. Es ordinadors tanben sajen d’estauviar espaci per poder trabalhar milhor. Er Univèrs poirie hèr çò de madeish. Ei ua naua manèra de pensar ena gravetat pr’amor que poirie èster era resulta d’un Univèrs que vòu demorar organizat ».
Abans Vopson ja auie afirmat qu’era informacion a ua massa, e que totes es particules elementàries an informacion sus eres madeishes, com hèn es cellules, qu’an er ADN. Ara vòu demostrar qu’era pixelacion espaciau des cellules elementàries poirie èster una manèra d’emmagazimar donades e qu’aguesta done es proprietats e coordenades dera matèria en un univèrs simulat d’espaci e temps.
Cada cellula pòt enregistrar informacions ena forma de donades binaries. Eth procés serie semblable a quan un ordinador mòstre ua realitat virtuau mès tot ei ua simulacion, çò apondèc Vopson. Eth sistèma desplaçarà es particules en espaci enta amassar-les en ua particula major laguens ua soleta cellula.
“Açò provòque era arribada dera atraccion, pr’amor qu’ei ua lei en sistèma computacionau ; cau minimizar eth contengut dera informacion pr’amor que non n’i a pro espaci. E, donques aguesta atraccion gravitacionau que serie un mecanisme d’optimizacion laguens un procès computacionau entà comprimir era informacion, çò didec Vopson”
Er estudi donques, presente ua nàua perpectiva sus era gravetat, pr’amor qu’afirme qu’aguesta existís pr’amor qu’er Univèrs vòu comprimir era informacion. Es implicacions d’aguest estudi arribaràn ara física fondamentau en tot inclúder es horats neri, era matèria escura e era gravetat e era informacion quantica. Mès se er Univèrs ei ua construccion computacionau o non, açò ei un prètzhèt qu’er scientific non vò encara descorbir. Er estudi siguec publicat ena revista scientifica online internacionau Advances AIP.
Era Redaccion
Fotografia principau: Jackie Niam/iStock
