ERA FIN DETH TRIASSIC
Aué es scientifics an cambiat era sua pensada sus perqué i auèren diuèrses granes extincions durant era fin dera epòca deth Triassic. Segontes es darrèrs estudis, i auec un volcanisme gigantàs que provoquèc er escandilhament de fòrça espècies a nivèu globau. Sonque un fenomèn atau poirie explicar se qué passec en aquera luenha epòca.
Un des estudis recents mès importants sus aqueth fenomèn ei eth que realizèc ua còla de geològs de China e Austràlia, que confirmèren era eivdéncia d’erupcions volcanicas episodicas a nivèu marin en diuèrses regions dera planeta que aurien provocat diuèrsi eveniments d’extincion en Triassic.
“Ua extincion massiua ei ua catastròfa horribla, çò didec Jian-Jun Fan des universitats de Jilin e Curtin e autor der estudi. Ath long dera istòria geologica dera Tèrra i auèren diuèrses extincions e d’aguestes n’i a cinc que son es mès importantes. Aguesti fenomens an cambiat totaument era vida ena Tèrra, mès tanben n’i auèren centenars d’autes que tanben siguèren importantes com era extincion deth Norian-Raetian, que passèc pendent eth Triassic ».
Extincions non guaire estudiades
Aguestis geològs volèren soslinhar qu’es cinc extincions mès granes que i auec ena Tèrra siguèren fòrça estudiades mès que es que siguèren a nivèu locau o sonque regionau, çò ei díder, es mès petites, non ne coneishem encara es causes. En aguest estudi, es geològs analizèren es isles e planes deth Altiplan tibetan entà saber quina siguec era evolucion der ocean de Tetis. E descorbiren tres grans fenomèns volcanics ara hè 250, 233 e 210 milions d’annades.
Cadun d’aguesti fenomèns demorèc aumens dos milions d’ans. En crotzar aguest donades damb d’autes, es scientifics podèren demostrar era relacion entre aguesti fenomèns e aumens 4 episòdis d’extincion dera fauna marina. « Son es marcadors dera mitat des extincions que i auèren pendent eth Triassic, çò dideren es geològs ».
“Qu’ei dificil poder trapar aqueri senhaus mès un còp açò hèt, çò afirmèren aguesti geològs, auem podut trapar e identificar fòrça erupcions volcanicas marinas que son es responsables dirèctes des extincions mès granes que i auec ena istòria dera planeta ». Aguest estudi siguec publicat ena revista scientifica internacionau online Geology.
Era Redaccion
Fotografi aprincipau: Chat GPT/Sapiéncia
