Una descobèrta inquietanta: de pichons tròces de plastic ofrisson als virus un refugi segur –e los plastics mai ancians semblan encara mai protectors. De tròces de plastic dins d’aiga pòdon constituir un recès segur pels virus, segon un nòu estudi scientific. Los virus sus de plastic demòran tanben mai de temps que los que i a sus d’autras superfícias. En mai d’aquò, la proteccion que lo plastic ofrís als virus creis segon que se descompausa. Aquò vòl dire que lo problèma environamental mondial se pòt lèu agreujar.
Los microplastics son aperaquí gaireben lo 80 % dels plastics trapats dins la mar. E plusors estudis an demostrat qu’aquel tipe de plastic pòt fòrça ajudar los virus a s’espandir. Fins a uèi, sonque se sabiá que podián ajudar las bacterias. Ara se sap que tanben pòdon ajudar los virus, çò qu’es plan mai grèu.
En 2022, de cercaires de l’Institut de Tecnologia de Nòva Jersey a Newark descobriguèron que los microplastics pòdon agir coma una basa per de bacterias resistentas als antibiotics. Aquelas bacterias son apuèi consumidas per d’umans e pòdon transmetre de malautiás grèvas. E subrevivon plan mai sus de microplastics que d’autras bacterias presentas dins la mar.
Segon Manfred Weidmann, de l’Escòla de Medecina de Brandeborg, en Alemanha, “los virus tanben pòdon demorar sus de microplastics. E aquò poiriá entraïnar un màger espandiment dels virus sus la planeta per mejan dels microplastics”.
De vertadièrs refugis
De cercaires de l’Universitat de Queensland a Brisbane, en Austràlia, estudièron cossí los virus aderisson a la superfícia de tròces de microplastic. “Avèm realizat un estudi d’absorcion plan aprigondit”, çò explica Ji Lu. Lu es microbiologista al centre australian de biotecnologia de l’aiga e de l’environament.
Amb l’ajuda d’un colorant verd especial, sa còla a fach lusir los virus. An pas utilizat de virus qu’infèctan. En luòc d’aquò, an emplegat un bacteriofag, un virus especializat – qu’infècta las bacterias – nomenat T-4.
Lo grop de Lu barregèt de T-4 amb de tròçes de plastic dins d’aiga. Puèi, mesurèron la luminescéncia de l’aiga. Aquò permetèt de conéisser quantes virus flotants i aviá. Puèi, determinèron quantes virus avián aderit. Utilizèron de plastic vièlh e de plastic nòu. Segon que lo plastic s’apichonissiá, los virus aderissián de mai en mai. E trapèron que fins al 98% dels microplastics portavan de virus. L’estudi foguèt publicat dins lo numeric Water Research.
Segon çò que semblariá doncas, l’estudi suggerís que “los virus pòdon restar sus de microplastics e demòrar contagioses”, çò soslihèron los cercaires. Òr, los oceans de tota la planeta contenon de mai en mai de microplastics. Es per aquò qu’aconselhan d’alternativas al plastic emplegat, “abans l’espandiment d’una autra grèva pandemia dins lo futur”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
