La paleoantropologia actuala es estonada. Una nòva datacion de divèrses crans fossils del siti arquologic chinés de Yunxian suggerís que los primièrs Homo erectus ja vivián en Asia orientala ara fa mai d’1,7 milions ans. Aquò es far recular la preïstòria d’aquesta espècia gaireben 670.000 ans. Se foguèt aital, la sortida d’Africa dels primiès ominids se debanèt d’un biais fòrça rapid.
Fins a uèi los fossils pus ancians d’Homo erctus asiatic son d’entre fa 1,78 e 1,85 milions d’ans. Son los fossils trobats a Dmanisi, a Geòrgia. Se parlam dels fossils trobats mai a l’èst, la comunautat scientifica aviá pas trobat una data definitiva encara. «Se Homo erectus es lo nòstre aujòl mai luenhan, çò diguèt Christopher Bae, de l’Universitat de Hawaii, se coneissiá pas quand sortiguèt d’Africa e quand aviá arribat a Asia orientala”.
Mas ara, çò afirmèron los cercaires de la còla dirigida per Bae, poguèron bastir una cronologia plan solida d’aquel moment. Per o poder far, los cercaires usèron la tecnica de datacion d’isotòps d’Alumini-26 e de Berilli-10. E mesurèron la possibla edat dels crans de Yunxian. Cal remembrar qu’aquesta tecnica es basada sus los isotòps Al-26 e Be-10 produches quand los rais cosmics arriban al mineral de qüars.
Una datacion essenciala
Mas aqueles isotòps s’arrestan aprés que lo cran demòra jos tèrra. Aprés mesurar los isotòps, los cercaires poguèron calcular quant demorèt sepelit lo cran. Val pas dire qu’aquesta es una tecnica essenciala, pr’amor que la datacion classica del carboni-14 finís aprés los 50.000 ans.
Mas la nomenada datacion Al-26/Be-10 permet datar material fins als 5 milions d’annadas. Fins ara los paleoantropològs avián estimat que los fossils chineses de Yunxian avián una edat d’entre 800.000 e 1,1 milions d’ans. Mas las nòvas datacions estonèron los cercaires, pr’amor que metián en question aquelas datacions, çò diguèt Bae.
Ara doncas, la paleoantropologia pòt dire segur qu’Homo erectus ja aviá arribat a China fa 1,7 milions d’ans. Aquò es pas lo meteis que dire quand arribèt Erectus a Asia. Sonque qu’en aquela epòca ja èra present a Asia orientala. Tanpauc es conegut quand s’escandilhèt. Los cercaires, en mai d’aquò, tanben vòlon mesurar quand i arriberòn las autras espècias ominidas, coma la nòstra. La datacion d’aqueles crans foguet publicada al numeric Science Advances.
La redaccion
