La comunautat scientifica internacionala alèrta del possible esfondrament del Corrent Atlantic, çò que poiriá provocar una nòva edat de glaç dins lo Mond. Lo cambiament climatic ven doncas un problèma e quita d’èsser solament una question environamentala.
Es Islàndia que sonèt l’alèrta. Lo Corrent Atlantic se poiriá esfondrar. E aquò es un risc grèu per la seguretat e l’existéncia de l’umanitat. Pr’amor que seriá lo primièr còp que i auriá aquel dangièr. Lo fach foguèt confirmat davant lo Conselh de Seguretat de las Nacions Unidas e restaca lo risc geologic amb una granda menaça per la geopolitica internacionala.
L’alèrta a per basa de donadas scientificas de mai en mai solidas. Tot aquò foguèt publicat dins lo numeric Communications Earth & Environment, e s’i mòstra de senhals clars que lo corrent atlantic nòrd a de mens en mens de velocitat. La causa ne seriá la calor de tot en tot inabituala de l’aiga de l’Atlantic eqüatorial.
Los primièrs enregistraments remontan als ans 1960 e ja se pòt alara parlar d’un Corrent Atlantic de mai en mai lent. Mas dempuèi la fin del sègle XX la tendéncia s’accelèra. L’activitat umana ne seriá la causa finala, amb una temperatura de la planeta de mai en mai nauta. Car de mai en mai d’aiga dolça atenh lo corrent atlantic pr’amor de la fonda de glaç de Groenlàndia e aquò redutz la quantitat de sal de l’ocean. Aquò empacha l’aiga de s’enfonzar e son cicle pòt pas pus contunhar.
Una situacion tras qu’alarmanta
Segon l’oceanograf Stefan Rahmstorf, de l’Institut Potsdam, la situacion es « alarmanta pr’amor que i a de mens en mens de temps per reagir e lèu se poiriá arribar a un moment clau de l’istòria de l’umanitat. Car aquò provocariá una nòva edat de glaç sus la planeta ».
Se la calor actuala foguèsse afectada per aquel fenomèn, la temperatura pendent l’ivèrn del nòrd d’Euròpa tombariá fòrça e la region seriá tocada per una freg extrèma e de nivèls de glaç jamai trapats de per abans durant l’epòca mai modèrna. E tot aquò provocariá de cambiaments globals.
Son estats realizats de modèls que fan pensar que la rompedura del sistèma de pluèjas poiriá entraïnar de grèvas consequéncias per de regions coma Índia, l’America del Sud e l’Africa de l’Oèst. E aquò poiriá èsser una catastròfa per de milions d’èssers umans.
Lo fenomèn tanben aumentariá la calor de l’emisfèri sud, e elevariá lo nivèl de la mar dins d’airals coma la còsta dels Estats units. Euròpa, per contra, patiriá d’estius amb de secadas extrèmas e d’ivèrns fòrça freges, una vertadièra menaça per la pesca e l’agricultura de la region.
Lo Corrent Atlantic Nòrd ja s’esfondrèt fa 12000 ans, justament abans la fin de la darrièra edat de glaç que la visquèt lo Mond. Segon l’Institut Potsdam, lo fach se poiriá téner aperaquí en l’an 2100 se las emissions de CO2 contunhan aital. E doncas cal ja far de previsions governamentalas.
Islàndia foguèt pas la soleta a avisar d’aquò. Lo Conselh Nordic dels ministres del nòrd d’Euròpa li balhèt son sosten. En octòbre passat, amassèt mai de 60 expèrts per analisar çò que se poiriá passar se lo Corrent Atlantic s’arrestèsse. D’autres païses coma lo Reialme Unit tanben an començat d’estudiar lo fenomèn en tot balhar mai de 81 milions de liuras per la recèrca scientifica. Ara es Norvègia qu’o vòl estudiar. Car es una menaça per la seguretat del país. Quin serà lo país seguent que sonarà l’alèrta?
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala:Stockphotos/CC
