Nòus estudis confirman que los primièrs organismes vius que i aguèt a la planeta bastiguèron la siá quimia al torn del molibdèn. Aquò se passèt ara fa mai de 3.4 miliards d’ans quand los micròbis dependián del molibdèn (pla rar a l’epòca) e encara experimentèron amb lo tungstèn. La descobèrta poiriá cambiar la vision qu’avèm a l’ora de cercar de vida en d’autras planetas.
Aital, l’evidéncia geoquimia suggerís que malgrat que i aviá pas gaire molibdèn als primièrs oceans, la vida ne dependiá e plan. Fins ara los cientifics afirmavan que la vida poiriá aver usat lo tungstèn primièr per subreviure e après lo molibdèn per se desvolopar mai aisidament.
Un estudi recent, dirigit per Betül Kaçar, de l’Universitat de Wisconsin-Madison, assajèt de demostrar aquesta idèa : « Lo molibdèn es un metal de transicion que demòstra una istòria evolutiva misteriosa per çò que tanh a la biologia environamentala , çò diguèt Kaçar ».
De cambiaments biogeoquimics
«Lo molibdèn participa en de cambiaments biogeoquimics clau del carbòni, lo nitrogèn e o lo sofre. La sciéncia ja fa decadas que prepausa qu’a una istòria plan interessanta, çò diguèron ls cercaires. Caliá poder o demostrar ». Pr’açò los cientifics analisèron lors gèns e identifiquèron qualas espècias actualas encara an los gèns responsables del transpòrt, emmagazimatge e bastiment d’enzims del molibdèn.
Amb aquela tecnica poguèron bastir l’istòria evolutiva d’aquelas proteïnas qu’utilizan molibdèn e tungstèn uèi lo jorn. Tanben estudièron amb prigondor l’usatge aquestes elements quimics dins las cellulas vivas. Descobriguèron que lo molibdèn demorèt pendent fòrça temps malgrat qu’èra un element plan rar a la Tèrra pus anciana. Malgrat aquò poguèron confirmar que los micròbis ancians l’usèron ara fa tre 3,3 e 3,7 miliards d’ans.
«Lo molibdèn èra pas gaire comun en aquela epòca, çò diguèron los cercaires. Plan mens comun abans de l’arribada de la fotosintèsi amb d’oxigèn. Mas la vida contunhèt en tot evolucionar pr’amor qu’utilizèt lo molibdèn e aquò demorèt en los organismes actuals ». Cal remembrar que comprene aquò ajudarà plan a identificar la vida en d’autras planetas.
Car, per aqueles cientifics se un element es brica comun vòl pas dire que la vida pòsca pas se desvolopar parièr. Pòt tanben bastir tot un empèri amb aquel element. «La vida funciona de manèras estonantas. E aquò fa pensar que la vida en defòra de nòstra planeta poiriá entraïnar escasenças desparièras a çò que coneissèm uèi lo jorn. L’estudi foguèt publicat al numeric Nature Communications.
La Redaccion
