Era pèlvis d’un esquelet parciau d’Ardipitecus ramidus ( que demorèc hè 4,4 milions d’annades ) a dat evidéncies qu’aquera aluenhada espècia ominida podie pujar en es arbes mès tanben caminar. Atau ac confirme un nau estudi hèt pes antropològs Elaine Kozma e Herman Pontzer, dera Universitat de Naua York.
Açò maugrat qu’en antropologia tostemps s’a dit qu’era evolucion des ominids entath bipedisme aurie sacrificat es abilitats d’aguesti animaus entà pujar en es arbes. Ara, totun, un nau estudi publicat ena revista Proceedings of the National Academy of Sciences confirme çò de contrari.
“Ardipitecus aurie evolucionat a solucion qu’ère ua barreja -. Çò diguec Pontzer-. Atau, auie ua capacitat fòrça desvolopada entà pujar en es arbes mès tanben entà caminar. Açò ei un hèt que non se pòt veir en es simis d’aué o en es umans”.
Ua pèlvis diferenta
En estudi hèt ara per aqueri antropològs se confirme qu’era pèlvis qu’auie Ardi ei totauments diferenta dera qu’auec, per exemple, Lucy, un especimèn basat en un esquelet d’Australopithecus afarensis e que tanben viuec en Africa mès hè solament 3,2 milions d’annades.
Segontes aquera còla d’antropològs era pèlvis d’ardipitecus ei tan longa coma era des umans e qu’açò facilitaue poder pujar en es arbes mès tanben caminar. Ère ua pèlvis que non ère coma era de Lucy, çò vò díder orientada entà darrèr dera pèlvis baisha. Aguest hèt permetie, ath delà, qu’es musculs dera esquia tanben ajudèssen en eth bipedisme, çò confirmèc era paleoantropologa Carol Ward, dera Universitat de Missouri en Columbia.
A mès, Ardi non auie un muscul gluteus maximus fòrça desvolopat – un hèt qu’an tanben es umans actuaus pr’amor que caminen – mès que l’auie relatiuaments petit. Totun, qu’es antropològs an comparat era pèlvis d’Ardi, era de Lucy, ua auta d’un Australopithecus africanus e encara ua auta d’un simi que demorèc hè 18 amilions d’annades, Ekembo nyanzae.
Es australopitecus ja non auien es madeishes capacitats entà pujar en es arbes qu’es ardipitecus. Era sua pèlvis èra diferenta e era de nyanzae non permetie caminar, coma en es simis actuaus.
Aguest nau estudi ei un aute mès des que prepausen qu’era esquia d’Ardi permetie caminar fòrça ben – çò confirmèc Owen Lovejoy, dera Universitat Kent State en Ohio-. “Es australopitecids caminauen coma nosati – çò diguc Lovejoy – mès ara auem podut demostrar qu’es ardipitecus tanben “.
Un hèt antropologic susprenent. Non pensàuem qu’es ominids caminèssen dreti coma nosati ja hè tan de temps: 4,4 milions d’annades: es caracteristiques dera nòsta espècia son donques fòrça mès ancianes.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
