Es estada trobada una proteïna dins la sang que poiriá ajudar a trobar las personas que poirián desvolopar pus tard la malautiá d’Alzheimer. E aquò d’annadas abans l’aparicion dels primièrs signes d’aquela malautiá. Los cercaires qu’o an trobat an ja demandat la permission d’efectuar aquela analisi sus de milions de personas.
Segon un dels mètges de la còla qu’a descobèrt cossí trobar qualas personas poirián desvolopar l’Alzheimer, lo doctor Brian Gordon, de l’Institut de Radiologia Mallinckrodt, de l’Universitat de Washington, aquò seriá una espròva “tant aisida coma lo fach de practicar una analisi de sang dins una clinica neurologica, res de mai”. A mai, e segon aqueles scientifics, la proteïna restacada amb la malautiá d’Alzheimer permetriá un tèst sanguin non especific als malauts d’Alzheimer mas ajudariá pereu a trobar d’autras malautiás neurologicas que se poirián desvolopar amb lo temps.
Aital, la còla que descobriguèt cossí far aquela analisi de sang soslinhèt que, uèi lo jorn, i a pas cap tractament efectiu per l’Alzheimer “pr’amor que de costuma la terapia comença tròp tard”. E lo nòu examen tròba una leugièra cadena neuronala ont i a una proteïna dins l’esqueleta de las neuronas. Sa preséncia pòt confirmar d’una manièra segura que la persona desvoloparà (aquò pòt arribar de desenats d’annadas puèi) una malautiá degenerativa coma l’Alzheimer. E aquò pr’amor que, quand i a un damatge al cervèl, aquela proteïna fugirà vèrs lo corrent sanguin uman.
Totun, cal trobar un naut nivèu d’aquela proteïna (qu’an pas volgut encara rendre public) dins lo còrs uman –un fach que tanben senhala de damatges cerebrals grèus–. E per o far cal aver de fluid cerebrospinal, çò que la màger part de las gents vòlon pas donar. Per ansin, la còla de cercaires que trobèt aquel nòu metòde trabalhèt cossí trobar aquela proteïna dins la sang.
Una simpla analisi de sang
Per aver una conclusion scientifica, la còla medicala qu’estudièt tot aquò trabalhèt sus de mond d’edats d’entre 50, 40 e 30 ans, fòrça annadas abans l’aparicion de malautiás neurodegenerativas coma l’Alzheimer. Aquò pr’amor qu’un mainatge a 50% d’escasenças d’aver la meteissa genetica que son paire en aquel afar. E desvoloparà Alzheimer a la meteissa edat que son paire o sa maire. Caliá doncas estudiar çò que se passa dins lo cervèl abans l’aparicion dels primièrs simptòmas.
400 benevòls i participèron (247 amb un còde genetic que los predispausariá a la malautiá e 162 que non). Divèrsas espròvas coma de tèstes de coneissença, d’escanèrs cerebrals e d’autras foguèron realizadas abans d’estudiar aqueles individús pendent 3 ans. La resulta foguèt que i aviá de diferéncias que podián arribar d’èsser trapadas fins a 16 ans abans l’aparicion dels primièrs signe d’una malautiá degenerativa cerebrala.
“Aquò es pro lèu (pus de 15 annadas) per considerar la resulta de l’estudi coma positiva, çò diguèt Stephanie Schultz, de la meteissa universitat de Washington. Es una resulta que permet d’identificar un desvolopament de malautiás coma l’Alzheimer fòrça abans l’aparicion dels primièrs simptòmas”.
La còla qu’a trobat aquel nòu metòde confirmèt que de nauts nivèus d’aquela proteïna indican que la persona poiriá patir lèu una deméncia corporala –malautiá de Lewy o encara d’Huntington– e que se n’i a un fum, la persona patirà una escleròsi multipla.
Las autoritats estatsunidencas poirián aprovar lèu un pichon esplèch per trobar aquel naut nivèl de proteïnas dins la sang. Après tot aquò, los doctors vòlon saber çò que causa una creissença de la proteïna e perqué aquesta fugís vèrs la sang. L’estudi foguèt publicat dins la revista numerica Nature Medicine.
La Redaccion
