De geològs trapèron çò que seriá un volcan sosmarin e que poiriá dintrar dins la categoria geologica de Yellowstone. Lo volcan se tròba prèp de las Illas de las Quatre Montanhas, en Alaska, e èra totalament desconegut fins a uèi lo jorn. Per ansin la Illas Aleutianas venon un dels territòris de la planeta amb un dels volcans mai grosses.
Las Quatre Montanhas son una archipèla d’illas situadas al centre de las Aleutianas qu’an fins a sièis estratovolcans dont lo Cleveland, l’Herbert, lo Kagamil, lo Tana e l’Uliaga. Ara, pasmens una còla de geològs poguèt confirmar scientificament la mesura gigantassa d’aqueste volcan e l’inclure dins la lista dels volcans pus grands de la Tèrra.
Lo volcan Cleveland es tanben estat un dels volcans mai actius d’America del Nòrd pendent los darrièrs 20 ans pr’amor que patís pichonas explosions que montan fins als nou quilomètres de nautor. Ja fasiá temps qu’una còla de geològs de l’Institut de Sciéncia Carnegie, dirigit per Dana Roman, aviá començat a l’estudiar per poder lo classificar segon aquelas erupcions.
Una granda caldera
Segon Roman i a plusors pròvas per afirmar qu’aquela arxipèla de las Quatre Montanhas poirián plan èsser totas restacadas a nivèl sosmarin a travèrs d’una gigantassa caldera.
Segon la geologia una caldera seriá diferenta d’un estratovolcan pr’amor qu’a dins una gigantassa reserva de magma. E quand i a tròp pression l’erupcion que se pòt debanar pòt menar a una vertadièra catastròfa car dins aquesta caldera i auriá una quantitat tras que nauta de magma.
L’erupcion d’una caldera es una de las erupcions mi grandas que se pòdon debanar sus la planeta e, sovent, e aquò tanben foguèt confirmat geologicament, pòdon aver de consequéncias globalas. Aquò es aital perque sorgisson tant cendre e gas a l’atmosfèra d’un sol còp que pòdon arribar a afectar lo clima de la Tèrra.
“Se podem confirmar, fin finala, qu’aquò es una caldera, çò diguèt Roman, seriá la primièra d’aquesta tipe que trapam jos l’aiga en las illas Aleutianas. Fins ara totas las donadas qu’avèm confirmarián qu’aicí avèm una caldera sosmarina”.
Pasmens, e malgrat totas las donadas qu’aguèt aquela còla, pas totes los geològs son d’acòrdi a l’ora de confirmar que jos las Illas de las Quatre Montanhas i a una caldera. Son demandadas doncas mai de pròvas scientificas e per aquò cal tornar a enviar una autra còla de cercaires a aquela archipèla. La classificacion de la caldera seriá doncas a l’ora d’ara sonque una ipotèsi. Qu’es un dels volcans sosmarins mai grands de la planeta òc que poguèt èsser confirmat.
“La nostra esperança ara, çò assolidèt Roman, es poder tornar a las Quatre Montanhas e estudiar d’un biais mai prigond lo sòl marin e las ròcas d’aquel airal. Per ansin, reculhir mai donadas sismicas e de gravetat que pòscan ajudar a classificar d’un biais definitiu que i a una caldera dins l’ocean en aquela region. L’ipotèsi d’una caldera tanben ajudariá plan a comprene l’activitat frequenta del volcan Cleveland”. L’estudi foguèt publicat per l’AGU’s Fall Meeting 2020.
La Redaccion
