UN BÒSC DAMB 300 MILIONS D’ANNADES
Scientifics chineses an descorbit una bòsc tropicau qu’a mès de 300 milions d’annades d’edat e que demorèc plan conservat pr’amor d’ua capa de cendre volcanic. Eth descorbiment aufrís ua escadença unica entà poder estudiar es ancians ecosistèmes deth Permian. Er estudi des cercaires siguec publicat ena revista internacionau Proceedings of the National Academy of Sciences e confirme qu’eth cendre volcanic caperèt era vegetacion lèu en tot crear ua fotografia deth lòc e tot conservar es plantes que i demorauen.
Aguesta horèst se trape apròp dera ciutat d’Uda, en Mongòlia interiora. Es cercaires creden qu’eth bon estat der airau permet har ua analisi espectaclosa. Eth cendre caperèt es arbes e plantes lèu lèu e pr’açò aqueth bon estat de conservacion. Herman Pfefferkorn, dera Universitat de Pensilvania, didec qu’ère ua situacion unica entàs paleontològs que podien atau veir aquera vegetacion anciana.
Ua horèst unica en China
Eth bòsc ei en nòrd de China. Un aute estudi scientific podec bastir un aute còp com ère era horèst fossilizada on i auien enquia 6 grops d’arbes que podien arribar enquias 60 mètres de nautada. Un prètzhèt unic ena istòria dera paleontologia internacionau.
Atau, aguesta horèst, prèpa a Wuda, en China, ei com ua region arturada en temps. Eth cendre volcanic capeeèt eth bòsc en sonque bèri uns dies e fòrça plantes demorèren enes madeishi lòcs on creishien. «Encara i podem trapar arrames damb huèlhes, çò didec Hermann Pfefferkorn, paleobotanic. Ei fòrça estonant ».
Era còla de cercaires identifiquèc enquia 6 grops diferents d’arbes ; hauguères o espècies escandides come ara Sigillaria o Cordaites, damb troncs que pòden arribar ben as 25 mètres de nautada. Tanben i an Noeggerathiales. Eth descorbiment ei considerat per fòrça cercaires com trapar quicòm deth passat ancian aué e ei ua grana ajuda ara ora d’estudiar diuèrses espècies de plantes escandides.
Entàs cercaires era capa de cendre volcanic arribec ara hè 298 milions d’annades, pendent eth començament dera epòca permiana. Alara es plaques continentaus terrèstres encara auien de formar eth supercontinent Pangea. Entà poder confirmar era edat dera horèst es scientifics analizèren enquia 1.000 mètres cairats de bòsc.
Eth descorbiment arribe dempús dera confrmacion dera arribada der Òme de Yunxian ara region ara hè mès d’1,7 milions d’annades. Enquia aué se pensaue que sonque auie 1,1 milions d’ans d’edat. Açò cambie e fòrça era istòria d’aguesta region asiatica. Se Homo erectus sortic d’Africa ara hè 1,9 milions d’annades ja ère present en China hè 1,7 milions d’ans. Çò qe vò díder que i arribèt fòrça rapid, maugrat que i a mès de 7.000 km des deth Sinaí enquia China.
Justament aguesta naua cronologia des hèts ja provoquèc era reaccion de bèri uns cercaires, que diden que dilhèu Homo erectus non s’escandilhèc jamès en Asia e que dilhèu tanpòc siguec era prumèra espècia ominina que i arribèc.
Era Redaccion
