La Fondacion Mondiala per la Natura (WWF) presentèt un nòu rapòrt sus l’estat de la fauna mondiala. La resulta de l’estudi es brica agradiva, car es demostrat qu’aquesta tombèt mai d’un 73% al long dels darrièrs ans. Segon aquesta organizacion, la situacion actuala es gaireben catastrofica a nivèl environamental.
Per ansin, lo rapòrt The Living Planet (La planeta viva) d’ongan, remembra que mai e mai elefants de forèst dessapareisson. Tanben de tartugas al Pacific, e val pas dire que lo gigantàs nombre d’espècias animalas que vivon a la Granda Barrièra de Coralh tombèt a de nivèls inquietants. E se aquò cambia pas, la situacion al futur mai pròche serà sonque « catastrofica ».
La Planeta Viva es un rapòrt estudi periodic de la situacion de la vida naturala a la nòstra planeta realizada per WWF. Pasmens, çò qu’es plan diferent del darrièr rapòrt d’aquesta organizacion es la resulta del rapòrt, car afirma que fins a un 73% de mejana de totas las espècias e plantas de la planeta blava tombèron fins a de nivèls inquietants pendent los darrièrs cinquanta ans.
D’ecosistèmas a la limita
« I a fòrça ecosistèmas que son a la limita e que pòdon pas pus, çò diguèt Tanya Steel, de WWF. I a fòrça ecosistèmas, coma lo d’Amazonas, mas tanben los escuèlhs de coralh de tota la planeta que son prèp de l’enfonzament total e aquò es plan, plan inquietant ». De remembrar que l’estudi foguèt realizat en tot estudiar la situacion de mai de 5.000 espècias d’ausèls, mamifèrs, anfibians e peissum de tota la planeta e l’analisi de lors populacions pendent los darrièrs 50 ans.
Segon aqueste rapòrt, mai del 60% de la populacion de dalfins de flume d’Amazonas dessapareguèron pendent las darrièras decadas pr’amor de la contaminacion e la minariá, a mai d’autras causas dirèctament ligadas amb nòstra espècia. Per contra, se la situacion de cèrtas espècias es brica bona, la d’autras encara poiriá cambiar, dont la dels gorillas de montanha que demòran a las montanhas de Virunga, a l’èst african, car lor populacion cresquèt mai d’un 3% entre 2010 e 2016.
Totun, WWF volguèt soslinhar qu’aquel tipe de notícias, malgrat que son bonas, son isoladas en mièg d’una situacion globala alarmanta, pr’amor de la destruccion contunha de l’environament. D’autres ecològs, coma Tom Oliver, de l’Universitat de Reading, tanben confirmèt lo fach ; ligadas amb d’autras chifras (dont las dels insèctes) la situacion mondiala de la fauna es gaireben d’estapa finala, d’esfonzament gaireben total per fòrça espècias. « La planeta pòt pas pus, çò diguèt »
Per WWF, las atacas contunhas a l’environament an pas fin, e aquò es la màger menaça que pòdon patir las espècias animalas. D’autras menaças plan dangierosas son, tanben, l’arribada d’espècias envasivas pr’amor del cambiament climatic, de malautiás e la pollucion. Segon Mike Barret, de WWF « lo biais qu’avèm de consumir la nòstra noiridura es un dels senhals mai clars de la pèrda d’abitat natural »
Lo rapòrt tanben afirma que la pèrda d’ecosistèmas locals ara ja es globala e que lo cambiament climatic actual sonque provoquèt un ritme màger de pèrda de biodiversitat. « Se Amazonas s’esfonza tanben o farà la sèlva americana e la situacion es tan marrida que cal daissar ja d’escaufar la planeta amb d’energias que totes sabèm que destruïsson la planeta, çò diguèron los autors del rapòrt ».
“Aquò tanben provocarà una granda menaça per nòstra pròpria espècia, çò apondèt Garret. E podèm e cal far quicòm per cambiar la situacion abans que siá tròp tard ». D’autres cercaires tanben confirmèron que cal far quicòm de biais urgent e collectiu pr’amor que, se que non, la planeta demorarà en una situacion tras qu’alarmanta.
Segon WWF, lo rapòrt a coma tòca alarmar la populacion de la planeta per se premanir per la pròcha Conferéncia sus la Biodiversitat de Nacions Unidas que i aurà lèu en Colómbia. Ailà s’i amassaràn mai de 200 govèrns mondials que ja avián confirmat que lucharián contra las atacas a l’environament dempuèi 2022. E prepausèron salvar, almens lo 30% de la natura en 2030.
Segon lo meteis rapòrt « l’environament es la causa de la nòstra santat, prosperitat e ben èsser e cal situar la responsabilitat dels govèrns (e pas dels ciutadans) a l’ora d’assajar d’arrestar aquel cambiament climatic, pr’amor que sonque aital poirèm salvar la Tèrra e la natura per de pròchas generacions ».
La Redaccion
Fotografia principala: Yasuhiro/CC
