Se pensam en grani predators, pensam tostemp en animaus. Imaginam un guepard ena savana, un grop d’orcas en ocean o encara en granes làmies blanques. An dents poderoses, arpes granes e ua capacitat fòrça nauta d’amagar-se e atacar per suspresa es sues predes damb precision. Totun, eth carnivòr mès intelligent dera planeta aperten ath mon des plantes. Atau ac afirma era revista scientifca Ecology.
Qu’ei un organisme que deishec estonada era comunautat scientifica internacionau. Eth sòn nom qu’ei Darlingtonia californica, ua planta carnivòra que demòra en zones umides des montanhes californianes. Non a nat sistema nerviós ne cap neurona, mès desvolopèc ua estratègia entà subervíuer fòrça sofisticada.
Es grans predators basen eth sòn succés ena sua letalitat totau quan ataquen mès era estratègia d’aguesta planta qu’ei dar neuridura e deishar víuer era major part des insèctes que la visiten. Er estudi siguec hèt per cercaires dera Unitat d’Ecologia des Comunautats Integratiues der Institut de Sciéncia e Tecnologia d’Okinawa, dirigits per David Armitage.
Toti es esquemes trincats
Es resultats d’aguest estudi qu’an trincat toti es esquemes mentaus que i auien enquiara. Segon es cercaires, solament eth 2% des insèctes que demòren sus aquera planta son capturadi. Enquiara se pensaue qu’ère ua estrategia mau concebuda. Totun, es donades demòstren tot çò de contràri.
Aguesta ei ua interaccion fòrça dinamica e fòrça organizada qu’ei mès apròp deth mutualisme e era cooperacion biologica que non predacion cèga. Atau, es vèspes entren e gèssen damb totau libertat des receptacles d’aguesta planta dempús de recéber aliment. E non pateishen nat dan.
Entà compréner açò es cercaires utilizèren era bioquimia. Siguec atau com descorbiren es nivèus de nitrogèn des insèctes que visiten era planta. Çò de normau ei auer un isotòp pesant particular; eth nitrogen-15. Mès es espècimens de vèspa que se pausen sus Darlingtonia californica an mès d’aqueth element sus eth sòn còs. Era rason d’aguest fenomèn ei qu’eth nèctar produsit pera planta non ei solament un liquid damb sucre, tanben a fòrça nitrogèn-15. Atau, eth chuc vegetau ven ua hònt regulara de neuridura entaus populacions locaus d’insèctes.
Aguest chuc càmbie era etologia des insèctes. Noirir-se d’aquera planta ei un risc menor que non morir laguens dera madeisha. A mès, es cercaires creden qu’aguesta planta pòt regular era pression cellulara des sues huèlhes entà poder capturar es predes de manera sellectiua. E jamès acabe damb es sues predes.
Aguesta capacitat de cambiar era conducta deth sòn environament ei çò que trinque totaument era concepcion tradicionau des plantes, qu’enquiara ère de predators passiui. « Ei interesant descorbir qu’ua planta cultive entà alimentar-se», çò didec David Armitage. Açò vò díder qu’es vegetaus tanben administren es sues ressòrçes a long tèrme, un hèt qu’enquiara solament se pensaue que podien hèr es animaus.
Tanben demòstre qu’era intelligéncia non necessite nat cervèth fisic. Se es animaus an de besonh recéber informacion entà atacar o non, es plantes usen es rets de senhaus quimics e electrics des sues cellules entà decidir ua causa o auta.
Eth descorbiment donques de Darlingtonia californica qu’ei grana. Poirie èster considerada oficiaument coma ua espècia basica des ecosistèmes montanhosi. E eth sòn ròtle enes regions umides de Califòrnia ei tan grana coma eth deth coralh en ocean o es mangròves ena còsta.
Darlingtonia donques ei ua planta basica en sòn ecosistema que pòt crear ressòrces quimies que dan era vida a tota era comunautat locau. Non destrusís er abitat entà subervíuer mès crèe ua simbiosi entre eth bòsc e es insèctes deth lòc. Entà beneficiar-se toti.
Damb Darlingtonia auem descorbit que non cau auer pautes entà córrer, uèlhs entà espiar o dents entà caçar. A viatges, eth predator pòt èster eth mès intelligent dera planeta e, ath còp, dar aliment e suenhar es sues pròpies predes.
Era Redaccion
Imatge principau: NoahElhardt (talk · contribs)/CC
