TRAPEN EN ARGERIA UTÍS QU’AN 2,4 MILIONS D’ANNADES

Un descorbiment des importanti se passèc hè pògui mesi en Africa deth Nòrd, exactaments en Argeria. Diuèrses pèires talhades per ominins hè aperaquí 2,4 milions d’annades sigueren trapades ath cant d’uassi talhadi pes madeishes. Açò poirie cambiar era opinion paleontologica actuau qu’afirme qu’Africa der Èst siguec eth lòc on se desvolopèc era tecnologia dera pèira umana.

Eth descorbiment siguec hèt per ua còla arqueologica e paleoantropologica internacionau en Ain Boucherit, en Argeria. E siguec pro important entà èster publicat en ua des mès celèbres revistes deth sector, Science. Damb es pèires e uassi talhadi trapadi en Algèria se poirie cambiar totauments era vision actuau qu’era sciéncia a sus Africa der Èst coma lòc d’origina dera cultura dera pèira ominina. E enquia refortilhe un scenari d’origina multipla d’aguesta madeisha tecnologia.

Enquia aué es evidéncies mès ancianes de pèires talhades per ominins (e classades coma utís olduvaians) son diuèrses pèires talhades trapades en Africa der Èst hè mès de 2,6 milions d’annades. Que poirien auer hèt es descendents de Lucy, ua australopitecus afarensis. Mès ara diuèrses pèires talhades e classades en Ain Boucherit son encara mès ancianes qu’es trapades en Ain Hanech e El Kherba, damb 1,8 milions d’annades e es mès ancianes jamès trapades enquiara ena còsta africana deth nòrd.

Eth classament e descorbiment siguec hèt per ua còla dirigida per Mohamed Sahnouni e qu’auec era participacion de diuèrsi centres coma eth CENIEH der estat espanhòu o deth CNRPAH algerian. Era recerca comencèc en tot explorar es nautes montanhes der èst argerian. Aquí siguec on se trapèren diuèrses pèires talhades e uassi talhadi per ominins damb ua edat d’entre 1,9 e 2,4 milions d’annades, çò ei mès ancianes qu’es d’Ain Hanech e El Kherba.

Pèires entà talhar hètes damb materiau locau

Atau, es diuèrses pèires talhades per ominins deishèren mèrques en forma de V caracteristiques en es uassi que sigueren trapadi ath cant d’aqueres. Es pèires sigueren hètes damb materiau locau e an ua forma poliedrica e esfereïdau. “Son utís tipics dera tecnologia de pèira der olduvaian d’ua edat d’entre 2,6 e 1,9 milions d’annades coma era trapada en Africa der Èst çò digueren es cercaires-. Totun, es pèires trapades en Ain Boucherit an mèrques un shinhau diferentes”.

“Era industria litica d’Ain Boucherit ei semblanta ara de Gona o Olduvai – çò confirmèc Shanouni – e demòstre qu’es nòsti ancessors la comencèren en tota Africa e non solament en Africa der Èst”. Pr’açò an prepausat considerar tot eth continent coma eth lòc mès ancian dera umanitat e non solament era còsta orientau.

Cau ara classar es ominins que heren aqueres pèires d’Ain Boucherit. Se pense ara qu’es ominins contemporanèus de Lucy (hè 3,2 milions d’annades) pogueren crotzar eth desèrt der Sahara fòrça abans que non se pensaue pr’amor deth descorbiment hèt ara en Air Boucherit. Es recercaires d’aquera còla demanen ara poder estudiar mès es fossils que i a en depaus deth Miocèn, Pliocèn e Pleistocèn e era sua industria litica entà situar melhor aqueth tipe d’industria.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita