SON TRAPADES PEADES UMANES DE HÈ 120 000 ANNADES EN ARABIA

Hè aperaquí 120 000 annades un petit grop de caçaires decidiguec marchar lonh des sues tèrres nadiues. Volien caçar un grop d’antelòps que i auie ena region. Sens o saber, auien abandonat tèrres africanes. Eth camin demorèc fòrça mesi e un dia arribèren, a trauèrs dera sabana a un lac plen d’animaus de tota sòrta: elefants, bòs, ipopotams, zebres, gazeles, e tanben leons e iènes. Un vertadèr paradís dera caça. Eth petit grop decidiguec arrestar eth sòn camin e demorar en aguest lac arabi diuèrsi dies. Çò que non sabien es que es sues peades demorarien aquiu enquiara eternitat.

Ei ua notícia importanta pr’amor que confirme era preséncia dera nòsta espècia, Homo sapiens sapiens, ena Peninsula Arabica aumens en aquera epòca, un hèt que non ère confirmat enquiara. A mès, confirmen tanben qu’aquera siguec era epòca ena quau era nòsta espècia deishèc per prumèr còp Africa e comencèc era conquista dera planeta. Era trobalha se debanèc en desèrt de Nefud, en Arabia Saudita.

 “I a epòques enes quaus es desèrts non son desèrts mès sabanes damb èrba  e on tanben i a lacs e arrius, çò confirmèc Richard Clark-Wilson, autor der estudi que confirmèc scientificaments aguest descorbiment. Siguec pendent ua d’aqueres epòques qu’es umans damb fòrça autes espècies animaus, abandonèren er interior d’Africa e arribèren enquiath lac preistoric d’Alathar, en Arabia saudita, on auem trapat mès de 376 peades animaus e entre aqueres tanben d’umans. Tot açò se debanèc hè 120 000 annades”.

Un descorbiment sensacionau

Segontes Mathew Stewart, deth departament d’Ecologia e Quimia en Institut Max Planck,  aguest descorbiment ei fòrça important paleontologicaments “ pr’amor qu’es peades son era soleta manèra qu’auem de confirmar qu’es umans sigueren de vertat en un lòc. E non i a non n’i a guaires”. Era còla de scientifics que hèc aqueth descorbiment confirmèc era trobalha de set peades umanes que, çò de mès segur, ei que son d’Homo sapiens, e qu’aurien ua edat d’entre 130 000 e 80 000 annades pr’amor qu’encara non sigueren descorbides traces d’Homo neanderthalensis en aquera region enquiara.

“Son peades que semblarien èster mès d’Homo sapiens que non d’Homo neanderthalensis, çò diguec Stewart. Quate d’aqueres peades sigueren trapades fòrça pròp d’un lac preistoric que i auec ena region ena epòca e podem pensar que sigueren dus o tres individús. Eth lac d’Alathar serie donques eth solet lòc d’aquera region visitat per umans, dilhèu pr’amor qu’era region ja començaue a èster mès e mès seca”.

A mès des peades d’aqueri umans, es cercaires podèren tanben trapar e confirmar eth descorbiment de diuèrsi centenats de peades d’auti animaus dera region com peades d’elefant, shivau, camèu e tanben un tipe de bò tipic d’aquiu. Tanben sigueren trapadi enquia 233 uassi fossils en Alathar e entre aqueri d’antelòps oryx e tanben d’elefants. Segontes semblarie toti aqueri animaus marchauen enquiath lac d’Athalar entà béuer aigua. E siguec aquiu on arribèren aqueth grop d’umans preistorics.

“Auem podut confirmar era preséncia ena region de mamifèrs com elefants e hipopotams e açò poirie voler díder qu’aquera region tanben ère fòrça atractiua tàs animaus e tàs umans ena epòca, çò apondec Michael Petraglia, dera Universitat de Queensland. Entà poder confirmar scientificaments era edat des peades auem estudiat eth sable deth lòc. Son donques peades qu’an ua edat de 120 000 annades, çò ei ua epòca interglaciau”. Era trobalha siguec publicada ena revista online Science Advances.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita