Un nau estudi hèt pera Organizacion Mondiau dera Salut confirmèc qu’er antivirau Remdesivir non redusie eth risc de mòrt entàs persones que ja èren fòrça grèus de COVID-19 en es espitaus. Er estudi siguec hèt a nivèu internacionau e es sues conclusions sigueren hètes publiques era setmana passada.
Entà hèr aguest estudi, era Organizacion Mondiau dera Salut auec donades de mès de 450 espitaus de mès de 30 païsi e que proviegen de mès d’11 000 malauts de COVID-19 d’aguesti espitaus. Es malauts aueren diuèrses medecines e entre aguestes remdesivir, hidrocloriquina, lopinavir e interferon-beta1a. E cap d’aguestes drògues ajudèc a redusir es mòrts des persones grèus en aguesti espitaus.
Cap dròga demostrèc utilitat medicau
A mès, cap d’aguestes medecines podec tanpauc redusir es problèmes de respiracion de persones que non èren tan grèus ne era sua estada en espitau. Er estudi siguec publicat en medRxiv.org. Ei un trabalh qu’encara non arrecebec critiques d’auti scientifics mès que quauqu’uns diden que poirie cambiar ath long deth temps.
D’auti estudis hèts abans ja auien confirmat que ne lopinavir ne era hidroxicloriquina non ajudauen entà lutar contra era COVID-19. Era Organizacion Mondiau dera Salut volguec hèr public er resultat d’aguest estudi entà lançar un messatge totauments clar entara opinion mondiau dera planeta. Aguestes drògues non ajuden a redusir en nombre de mòrts dera COVID-19.
E açò qu’anteriors estudis medicaus auien confirmat que remdesivir redusie enquia quate dies era estada des malauts en espitaus, Atau ac auie anonciat non hè guaire er Institut Nacionau de Malauties Infeccioses des Estats Units. Totun, qu’eth resultat non siguec considerat coma pro important entara organizacion mondiau. Eth messatge, totun non arribèc a temps e ara era administracion estatsunitenca ja auie donat autorizacion as espitaus d’aguest país entà utilizar aguesta dròga damb es persones malautes de COVID-19.
Segontes era Organizacion Mondiau dera Salut, i auien dus grops de persones malautes en aguest estudi. Eth prumèr siguec eth qu’arrecebec aguestes drògues. I auien enquia 2 743 persones e ne moriren 301. Eth segon grop èren 2 708 persones que solament arreceberen medecines convencionaus e cap dròga especiau coma aguestes, e ne moriren 303. Per tot açò, aguesta organizacion internacionau considerèc que cap d’aguestes drògues non ajudèc entà redusir es mòrts de COVID-19. Totun, era volontat ei de contunhar er estudi e hèr-ne d’auti mès prigonds entà confirmar definitiuaments aguesta prumèra conclusion o n’auer d’autes.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
