Malgrat que l’estudi fach siá pas definitiu, una analisi del grop sanguin de divèrses malauts d’espitals catalans confirmariá que las personas qu’an lo grop sanguin O patisson un risc fòrça mendre d’èsser victima de la pandemia de la COVID-19. Tala es la conclusion d’un estudi fach per l’Universitat de Barcelona.
Segon l’estudi, totas aquelas personas del grop sanguin O an fòrça mai de defensas biologicas per luchar contra de malautiás e la COVID-19 ne seriá pas l’excepcion. L’estudi, a mai, confirma, pr’amor de lor nivèl de defensas, que las personas del grop sanguin A serián las qu’aurián un risc mai naut de se contaminar e de desvolopar de formas grèvas de COVID-19.
L’estudi vòl èsser una ajuda a la comunautat scientifica per estudiar perqué cèrtas personas patisson un risc mai naut d’agantar la COVID-19, e cèrca de dobrir la discussion per que i aja mai d’estudis prigonds sus aquel ponch e que se descobrisca s’aquò se passa al nivèl global en totes los malauts que patisson aquela malautiá o s’aquò sonque se ten al nivèl local.
Per far aquel estudi, qu’es estat publicat dins la revista numerica Blood Transfusion, la còla de cercaires qu’a analisat aquel fach agachèt la sang de desenats de personas que ja avián patit la COVID-19, e tanben d’autras qu’encara la patissián uèi lo jorn e èran grèvament espitalizadas. En mai de trobar que lo grop sanguin de las personas pòt èsser restacat dirèctament amb lo risc de se contaminar amb lo coronavirus, los scientifics tanben trapèron que lo grop sanguin es important pendent la quita malautiá e s’aquesta se pòt agravar.
Un risc mendre
Per ansin, la còla de cercaires qu’a estudiat aquò analisèt la sang de mai de 1 000 personas que ja avián patit la COVID-19 e qu’avián pas cap malautiá grèva en mai d’estudiar tanben la sang de mai d’una centenat de malauts actuals espitalizats. Los primièrs avián un risc fòrça mendre d’èsser victimas d’aquela pandemia pr’amor que lo risc de la patir èra fòrça mai bas. Aquò poiriá aver per causa que las personas del grop O an mai de defensas, çò es d’anticòrses dels tipes A e B que d’autras personas an pas e que pòdon luchar benlèu melhor contra la COVID-19; en consequéncia, lo risc de se contaminar es mendre.
Segon Eduard Muñoz, un dels cercaires d’aquel estudi, “ i a una proteïna coneguda coma S qu’a una estructura plan similara a la del grop sanguin O, e quand lo virus ataca la sang d’un persona d’aquel grop lo cors uman reagís en tot atacar lèu-lèu lo virus e empedís qu’aqueste s’espandisca dins l’organisme”.
Pasmens, los cercaires tanben soslinhèron que, se se vòl téner de bonas defensas contra la COVID-19, “çò que cal aver, d’en primièr, es un sistèma immunitari plan fòrt, e aquò se fa mai dins la populacion que dona de sang, qu’an una mejana d’edat de 45 ans e qu’an pas cap de malautiá”. Dins lo grop de personas qu’o pòdon pas far, un 42% aurián lo grop sanguin del tipe A e un 47% del tipe B e sonque un 11% del tipe O. Mas, çò apondèron, l’edat seriá tanben un factor tras qu’important malgrat lo sistèma immunitari de cadun e lo grop sanguin.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
