De tot en tot estonable. De cercaires alemands de l’Institut Max Planck d’Antropologia Evolutiva an pogut confirmar qu’aver una forma mens redonda del cran uman a l’ora d’ara es restacada dirèctament amb de genòmas neandertalians. Çò es, dich d’autra manièra: s’avètz pas lo crani totalament redond, sètz un pauc neandertalian.
E aquò pr’amor que lo crani e lo cervèl redonds son una caracteristica morfologica tipica de nòstra espècia. Pas dels neandertalians, qu’avián un crani fòrça mens redond. Ara, e après que s’es demostrat que i aguèt de crosaments entre nòstra espècia e los neandertalians (e benlèu tanben los denisovans) arriban mai de pròvas sus los gèns d’aquela autra espècia, Homo neandertalensis, dins la nòstra e qu’arribarián fins ara.
L’estudi, que pòt plan èsser fòrça polemic dins la comunautat scientifica, es estat publicat dins la revista Current Biology. Foguèt dirigit per l’antropològ Philipp Gunz, de l’Institut Max Planck, e amb aquel an volgut demostrar quant es encara presenta la genetica neandertaliana dins nòstra espècia, Homo sapiens sapiens. “Avèm mesurat de pichonas variacions endocranianas dins lo volum e las connexions de cèrts airals cerebrals pr’amor de la forma del crani”, çò confirmèt Gunz”.
En cèrca del gèn neandertalian
Aital, la còla scientifica qu’a fach aquel estudi antropologic e psicolingüistica comencèt de cercar de gèns neandertalians qu’encara poiriá aver nòstra espècia pr’amor d’ancians crosaments de populacions d’ambedoás espècias. Pensavan que podián trapar de pròvas fisicas. Èra malaisit mas o poguèron far scientificament, fin finala.
Per ansin analisèron la forma del cran e l’ADN dels neandertalians que podián èsser trobats en d’umans modèrnes. Per o realizar, utilizèron d’escanèrs cerebrals e genetics de fins a 4500 personas. E restaquèron la forma del crani amb l’informacion genetica. La descobèrta que faguèron es totalament estonabla.
Los cromosòmas 1 e 18 de l’espècia neandertaliana èran encara presents dins nòstra espècia, mas modificats. E èran fòrça restacats amb lo fach d’aver o pas un crani mai redond. A mai, èran restacats amb lo desvolopament cerebral (UBR4 e PHLPP1).
La forma mens redonda del crani dels umans actuals foguèt restacada amb aqueles cromosomas neandertalians. E aquò poiriá aver coma resulta una compreneson e una coordinacion de movements desparièra de las d’autras personas, çò volguèt soslinhar Gunz. “Es restacat dirèctament amb de foncions cognitivas coma la memòria, l’atencion, l’aprendissatge, l’utilizacion lingüistica”, çò diguèt.
Totun, los cercaires reconeissèron qu’aquel tipe de crani mens redond tipicament neandertalian foguèt trobat sonque dins de crans tipics e fòrça mens redonds que çò que seriá la nòrma. “La varianta neandertaliana menèt a de pichons cambis e a una forma pauc ponchuda d’un cran mens redond e res mai, çò confirmèt lo coautor de l’estudi, Simon Fisher. Mas es segur que lo camin es dobèrt, e lèu trobarem d’autras caracteristicas geneticas neandertalianas en d’umans modèrnes”.
Ara, la meteissa còla vòl estudiar aquela genetica en de desenats de milièrs de personas pr’amor qu’açò poiriá permetre de descobrir d’autres gèns associats a un cran redond o encara d’autras caracteristicas biologicas neandertalianas encara presentas dins nòstra espècia. “Es segur qu’ajudarà a melhor conéisser l’evolucion cerebrala umana de nòstra espècia”, çò apondèt Fisher.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
