Mantun cercaire que prepausa adara trobar navèras honts d’aiga entà l‘umanitat dont lo vapor d’aiga que i a suus oceans dens l’atmosfèra. Segon mei d’un estudi recent, desvolopar navèras estructuras entà poder aquò har que seré un esfòrç briga haut entaus umans e que poiré estar la solucion a la fauta d’aiga qui pateish la planeta uei.
Un aprovesiment quasi illimitat d’aiga doça qu’existeish en fòrma de vapor d’aiga au dessús deus oceans de la Tèrra, mes rèsta sens profièch, qu’an declarat los cercaires. Un estudi navèth de l’Universitat d’Illinois qu’ei la prumèra a suggerir un investiment dens ua navèra infrastructura capabla de recoltar la vapor d’aiga oceanica coma solucion aus aprovesiments limitats d’aiga doça dens divèrs endrets deu monde.
L’estudi, dirigit per Praveen Kumar, del Prairie Research Institute, qu’a avalorat 14 sites somés a un estrès idric on i poiria auer ua estructura ipotetica capabla de capturar la vapor d’aiga au dessús de l’ocean e de la condensar en aiga doça. E ac har d’ua faiçon qui demorarà hasedera de cap au cambiament climatic continú. L’estudi es estat publicat dens la revista Nature Scientific Reports per Preveen Kumar e Francina Dominguez.
Ua penuria d’aiga mondiau
“La penuria d’aiga qu’ei un problèma mondiau pr’amor de la baisha deus nivèus d’aiga dens lo bacin deus fluvis, qui afècta tanben l’ensemble de l’oèst deus Estats Units”, qu’a declarat Kumar . “Totun, dens las regions subtropicaus, com l’oèst deus Estats Units, los oceans vesins l’aiga s’evapora pr’amor qu’i a pro d’arrajòu solar e una plan febla cobèrta ennublada tot lo long de l’annada.”
Las tecnicas precedentas de reciclatge de las aigas usadas, de semiatge de las nublas e de dessalement n’an pas encontrat qu’ua escaduda limitada, qu’an declarat los cercaires. Maugrat que desplegadas dens daubuas regions deu monde, las usinas de dessalament son confrontadas a problèmas de durabilitat pr’amor de las aigas usadas cargadas d’aiga-sau e de metaus pesucs, a tau punt que Califòrnia a recentament regetat las mesuras qu’an per mira d’ajustar navèras usinas de dessalement.
“Tot comptat e debatut, que deuram trobar un mejan d’aumentar l’aprovesiment en aiga doça, pr’amor que la conservacion e l’aiga reciclada de las honts existentas, maugrat qu’essenciaus, ne sufiseràn pas a respóner aus besonhs umans. Lo noste navèth metòde prepausat ac pòt har a gran escala. “, qu’a declarat Kumar.
Los cercaires qu’an efectuat analisis atmosfericas e economicas deu plaçament d’ipoteticas estructuras de 210 mètres de largor e 100 mètres de hautor. Gràcias a las lors analisis, los cercaires qu’an concludit que la captura de l’umiditat a la susfàcia deus oceans ei hasedera entà de nombrosas regions deu monde en situacion d’estrès idric. L’apòrt en aiga estimat de las estructuras prepausadas que poiré hornir aiga doça aus centres grans de populacion de las regions subtropicaus.
Ua de las projeccions mei solidas deu cambiament climatic qu’ei que las regions secas vairàn mei secas e las zònas umidas que vairàn mei umidas . “las regions actuaus qui coneishen ua penuria d’aiga que seràn probablament enqüèra mei secas a l’aviéner, çò qu’agravarà lo problèma”, qu’a declarat Dominguez . “E malurosament, las gents que contunhan de’s desplaçar cap a zònas limitadas en aiga, com lo sud-oèst deus Estats Units.”
Totun, aquera projeccion de condicions de mei en mei aridas que favoriza la tecnologia navèra de recuperacion de la vapor oceanica. “las projeccions climaticas mòstran que lo flux de vapor oceanica harà pas qu’aumentar dab lo temps, hornint enqüèra mei d’aprovesiment en aiga doça”, qu’a declarat Rahman.
“Atau, l’idèa qui prepausam que serà realizabla dens l’encastre deu cambiament climatic. Aquò que horneish un apròchi indispensable e eficaç entà l’adaptacion au cambiament climatic, en particular entà las populacions vulnerablas vivent dens las regions aridas e semiaridas deu monde.
Los cercaires qu’an declarat que l’ua de las caracteristicas mei elegantas d’aquera solucion prepausada qu’ei que foncione com lo cicle naturau de l’aiga: “la diferéncia qu’ei que podem indicar on va l’aiga esventolada de l’ocean”, qu’a declarat Dominguez. “Quan Praveen m’a apressat dab aquera idèa, que ns’èm demandats tots los dus perqué arrés n’i avèva pas pensat abans, pr’amor qu’aquò que semblava estar ua solucion autant evidenta. Mes aquò n’ei pas jamei estat hèit abans, e que pensi qu’ei pr’amor que los cercaires son concentrats sus la tèrra. Mes lo noste estudi que mòstre qu’autas opcions existeishen de hèit. » Los cercaires qu’an declarat qu’aqueth estudi obreish la pòrta a de navèths investiments en d’infrastructuras qui pòden respóner eficaçament a ua penuria mondiau creishenta d’aiga doça.
La Redaccion
