AN DESCOBÈRTA UNA NÒVA ESPÈCIA D’ESPINOSAURE
Una nòva espècia d’espinosaure, Spinosaurus mirabilis, descobèrta en Africa, en Nigèr, sortís d’èsser presentada. Los paleontològs son estonats pr’amor qu’es la primièra espècia d’espinosaure descobèrta al Mond dempuèi fa mai de 100 ans. L’espinosaure foguèt un dinosaure carnivòr manjaire de peissum que viviá pendent lo Cretacèu, fa aperaquí 95 milions d’ans.
Los fossils d’Spinosaurus mirabilis foguèron trobats a Jengueb, dins lo Sahara central, en Nigèr, pel celèbre paleontològ Paul Sereno, de l’Universitat de Chicago, amb la siá còla. Çò que diferéncia Spinosaurus mirabilis d’autras espècias d’espinosaures, coma Spinosaurus Aegyptiacus, es una cresta craniana gigantassa que sembla una simitarra e que jamai non foguèt trobada abans en aquel genre de dinosaures.
«La cresta en forma de simitarra èra plan granda e pas brica inesperada. Quand l’avèm trobada amb de tròces de maissèla al desèrt, avèm comprés lèu qu’èra una espècia nòva d’espinosaure», çò diguèron los paleontològs.
Un estudi long
Spinosaurus mirabilis foguèt trobat en 2019 e es estudiat dempuèi l’an 2022. Es ongan qu’es presentat al public. Es justament l’estudi e l’analisi de la textura de la superfícia de la cresta (queratina) qu’an balhadas de pròvas scientificas sus l’espècia e qu’an confirmat qu’èra una nòva espècia d’espinosaures.
Los cercaires an confirmat qu’aquela cresta seriá estada, de tot segur, fòrça acolorida, e que se corbava cap al cèl per impressionar los rivals o atraire de partenaris. E la trobalha poiriá far cambiar la pensada qu’avèm sus tot lo genre spinosaurus perque fins ara los especimens trapats èran dins de depauses marins o litorals. E se pensava qu’èra un predator aqüatic.
Pasmens, lo sit de la descobèrta de la nòva espècia d’espinosaure, en Nigèr, es a mai de 1000 quilomètres de la còsta marina anciana e doncas ara los paleontològs creson que Spinosaurus mirabilis seriá demorat, puslèu, dins un mitan fluvial e non pas marin. Segon Paul Sereno, «èra un dinosaure que probablament demorava la màger part del temps a l’agach dins d’aiga mens prigonda per capturar de grand peissum».
Justament una d’aquela predas poiriá èsser estada lo celacant gigant Mawsonia, que demorava en Africa del Nòrd a l’epòca. L’estudi de la descobèrta de la nòva espècia d’espinosaure, Spinosaurus mirabilis, foguèt publicat dins lo numeric Science, una de las publicacions mai prestigiosas del mond scientific.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
