La fusta copada confirma que los objèctes trobats en America de l’epòca vikinga foguèron pas creats per de nacions indigènas mas per de vikings de l’autre costat de l’Atlantic. Segon l’istorian Dee, “la creissença de la produccion de radiocarbòni entre las annadas 992 e 993 après lo Crist es confirmada a travèrs dels anèls dels arbres de tota la planeta. Aquò a ajudat a melhor identificar la fusta talhada e la siá edat. En aqueles ans los vikings ja èran arribats en America ».
La trobalha se faguèt pr’amor d’una nòva tecnologia de la sciéncia astronomica. En 993, i aguèt una granda tempèsta solara que provoquèt una creissença de carbòni 14. Aquò demorèt registrat dins los arbres de l’airal. Es aital que los cercaires poguèron identificar la fusta emplegada a L’Anse aux Meadows, en Canadà. La fusta èra d’arbres talhats 28 ans après aquel fenomèn. La data demorèt coma 1021, qu’es lo moment que los vikings començavan de copar de fusta dels arbres de la còsta de Tèrranòva.
Son d’objèctes copats amb una destral metallica. Lo luòc foguèt ja estudiat pendent los ans 1960. L’arqueològa Birgitta Wallace volguèt servar las mòstras. Aquò a ajudat, ara, a poder trobar de datas mai exactas. Amb la fusta i aviá de claus de fèrre, una agulha de bronze e divèrsas estructuras que semblavan d’èsser escandinavas.
Un grop d’exploraires europèus
Uèi, los cercaires creson plan que totes aqueles objèctes foguèron fargats per un grop d’exploraires europèus. Los indigènas del luòc trabalhavan d’autras tecnicas mas pas aquelas. L’origina foguèt pas locala. E la talha dels arbres foguèt fach a l’encòp. Lo nòu estudi doncas confirma aquela data e balha de lutz a un dels episòdis mai escurs de l’edat mejana. Fins ara, los cercaires cresián que los vikings èran estats arribats al continent american o a la fin del sègle X o al començament del sègle XI. Mas ara la sciéncia a confirmat aquela nòva data.
La descobèrta ajudarà a situar tanben d’autras trobalhas aqueologicas de las illas de Labrador e Baffin. Uèi s’estúdia una possibla rota comerciala d’evòri de mòrsa entre Groenlàndia e Euròpa. Pr’amor que semblariá que i aguèt de rescontres entre los vikings e los inuits. Aquò confrmariá doncas e d’un biais definitiu la possibla preséncia vikinga en America. I arribèron 400 ans abans Colomb e uèi es una vertat istorica. Los anèls dels arbres e una tempèsta solara aital o confirman. Foguèt alara lo primièr còp que los europèus arribavan en America. Foguèron vikings e i pervenguèron en 1021.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: Joyce Hill/CC
