Es un fach qu’a luòc cada 405 000 ans. L’orbita circulara de la Tèrra dins l’espaci comença de cambiar de direccion pendent 202 500 annadas fins a formar una orbita elliptica. Es un cambiament de direccion planetari que s’es passat pendent de milions d’annadas.
La causa n’es la relacion gravitacionala que la Planeta Blava a amb d’autras planetas del sistèma solar coma Jupitèr e Vènus –lo primièr pr’amor qu’es una planeta plan granda amb una gravetat pereu granda, e la segonda pr’amor qu’es una planeta plan pròcha de la nòstra– .
Las chifras donadas son la resulta d’un nòu estudi publicat dins la revista numerica Proceedings of the National Academy of Sciences. Es çò qu’an trobat los cercaires après una analisi de plusors ròcas situadas dins lo Pargue Nacional del Bòsc Petrificat d’Arizòna.
La còla qu’a fach l’estudi a trobat que i a un cicle de 405 000 ans unifòrme dins la direccion de l’orbita terrèstra. E aquò s’es debanat atal pendent los darrièrs 215 milions d’ans. Es estat possible d’o descobrir après estudiar la quantitat d’urani presenta dins las ròcas, de ròcas qu’an una edat de prèp de 253 milions d’ans.
Un estudi nòu
Ja èran estats faches d’estudis de las ròcas, totun situadas a mai de 3200 quilomètres al nòrd-èst d’aquel luòc. E las resultas tanben mostravan de cicles de l’orbita de la Tèrra de 405 000 ans, çò que l’analisi de l’urani d’aquelas ròcas d’Arizòna a confirmat definitivament.
I aguèt pas cap de chifra contradictòria entre totes los estudis realizats. Las ròcas parlavan d‘un cicle ancian que lo patís la Tèrra e qu’es estat pogut estimar, fin finala, en 405 000 annadas. E aquò vòl dire que desenant serián utilizats de nòus metòdes per datar los eveniments preïstorics, sustot los fossils.
“Lo somi seriá de poder rescontrar de fossils – çò diguèt Dennis V. Kent, de l’Universitat de Rutgers e cap de l’estudi fach en Arizòna– e amb aqueste nòu metòde d’estudi, de descobrir de causas inconegudas fins ara. Las datas poirián èsser nòvas o benlèu las meteissas. Mas o cal provar”.
Segon los cercaires de l’estudi, doncas, es una descobèrta pauc comuna qu’ajudarà a trobar de nòvas datas dins los fossils e que benlèu poirián rescriure l’istòria de la planeta qu’avèm coneguda fins a uèi. De causas de la tecnologia.
A mai, segon Kent, lo començament d’aquel cambiament de direccion orbitala de la Tèrra fa mai de 215 milions d’ans aguèt per resulta l’aparicion sus la Tèrra dels dinosaures mas tanplan dels mamifèrs. “Es una epòca tras qu’interessanta”, çò confirmèt Kent.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
