Hè temps que mès d’un cercaire auie era volontat de descorbir ce quini èren es efèctes deth cafè entara salut umana, mès que mès, entar estomac. Pr’açò siguec hèt un nau estudi sus eth cafè, pr’amor que non n’i a guaires d’aguest tipe. Era resulta siguec fòrça susprenenta pr’amor que (e maugrat tot çò que podem pensar toti) eth cafè ei fòrça bon entara digestion e ajude entara creacion de chucs gastrics, biliars e pancreatics. E tot açò ei fòrça bon entara digestion. Er estudi siguec publicat ena revista online Nutrients.
“Béuer cafè ei ja tradicionau en es umans, çò diguec Astrid Nehling, cercaire der Institut Nacionau dera Salut Francés e especialista en cafè. Totun, se pensaue que non ère totaument bon pr’amor dera produccion d’acids que provòque. En nòste estudi auem estudiat com provòque eth cafè aqueri acids intestinaus e se ei bon entara salut umana o non”.
Entà hèr aguest estudi es cercaires analizèren es donades de mès de 194 estudis anteriors sus eth cafè. Era resulta siguec bona; se un beu cafè d’una manèra moderada, çò ei entre 3 e 5 tasses de cafè cada dia, ei un liquid que non provòque efectes dolents entara salut umana. A mès, béuer cafè redusís fòrça eth risc de patir pancreatitis”.
Era complèxa digestion
Era digestion umana ei un procés complèx, fòrça complèx. Cau segregar chucs gastrics biliars e pancreatics entà digerir ben es aliments. Enquiara se auie trapat qu’eth cafè ajudaue ena produccion dera ormona gastrina e tanben de diuèrsi acids idroclorics, presents en es chucs gastrics. Ara totun, a mès, siguec descorbit qu’eth cafè tanben ajude fòrça ena creacion de cholecistoquinina, ua ormona qu’ajude a produsir era bilis, clau en procés dera digestion umana.
A mès d’açò eth cafè siguec pendent annades associat damb eth crotzament des aliments en colon (quan aguesti crotzen eth colon). Ara siguec descorbit qu’eth cafè ajude fòrça en aqueth procès, mès encara qu’es cereaus, un 23% mès qu’eth cafè descafeinat e un 60% mès que béuer 1 litre d’aigua cada dia. E tanben protegís eth hitge de diuèrses malauties.
Ua d’aguestes ei eth carcinoma epatocellular, eth càncer de hitge mès comun que i a. Er estudi demostrèc qu’eth cafè ajude fòrça a arturar eth neishement d’aguesta terribla malautia e que tanben ajude entà arrestar d’autes coma era obesitat o minjar mau. “ Non pòt èster associat damb cap malautia digestiua, çò diguec Nehling. E tanben pòt ajudar a lutar contra eth restrenhement. E es bacteris que i a laguens deth cafè tanben son fòrça boni entara salut umana”.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
