Se se demandèsse quina poiriá èsser una de las piègers malautiás que la patís l’umanitat e que pejoran, pauques diriàn la resisténcia antimicrobiana. Pasmens, semblariá que, uèi lo jorn, i a de mai en mai de personas que la subissson e que ne morisson. Lo fach es inquietant e la comunautat scientifica n’a volgut avertir.
D’efièch, sonque en 2019 i aguèt mai de 1,27 milion de mòrts sus la planeta de personas que poguèron pas èsser salvadas pels mètges a causa de lor resisténcia als antimicrobians. Son d’infeccions bacterianas que pòdon pas èsser garidas pels doctors ni mai per la sciéncia actuala. E s’aquò es grèu, es d’aitan mai grèu encara que lor nombre creis. Aital, segon un rapòrt publicat dins la revista Lancet, i auriá, uèi, mai de mòrts per resisténcia als antimicrobians que per VIH o malària.
En mai d’aquò, la resisténcia als antimicrobians foguèt tanben decisiva en la mòrt de près de 4,95 milions d’umans, dont 1,27 dirèctament a causa de lor resisténcia als antimicrobians. Totas aquelas donadas son arribadas après l’estudi de milions de donadas d’espitals e centres medicals de mai de 204 païses. La còla qu’estudièt aqueste fenomèn recent son los diches Volontaris de la Resisténcia als Antimicrobians.
Dos tipes de resisténcia antimicrobiana
La resisténcia antimicrobiana se produtz, mai que mai, per doas rasons basicas: la primièra pr’amor que la persona ven resistenta a doas classas d’antibiotics, dont la penicillina, mas tanben las nomenas fluoroquinolònas. Aquò provocariá mai del 70% de las mòrts d’aquel tipe. E malgrat tot aquò, i a una longa lista de potingas per luchar contra aquel tipe de resisténcia als antimicrobians, mas sovent foncionan pas.
L’autra causa seriá l’infeccion de divèrsas bacterias dont Escherichia coli, Klebsiella pneumoniae o Staphylococcus aureus, que ne serián benlèu los piègers cases, pr’amor que i a pas res que pòsca garir lo malaut. Son de patogèns que pòdon provocar lèu d’infeccions grèvas en de personas que tenon de sistèmas immunitaris flacs.
Una situacion que pejora
Dins lo Mond, 64 mòrts sus 100 000 per infeccion microbiana son restacadas justament a de potingas que son pensadas per luchar contra aquel tipe de resistència. Sonque 16,4 personas sus 100 000 morisson dirèctament d’aquelas infeccions, çò que vòl dire que las potingas creadas per luchar contra aquela resisténcia als antimicrobians son, uèi lo jorn, piègers que las quitas infeccions bacterianas car son a l’origina de la majoritat de las mòrts.
Per region, l’Africa subsahariana a lo nivèl mai elevat d’aquelas nautas tassas de mortalitat: 114,8 mòrts sus 100 000 se produson a causa de tractaments contra aquela resisténcia als antimicrobians, e 27,3 sus 100 000 per la quita resisténcia. Las chifras an confirmat que i a mai de mòrts dins los luòcs ont i a mens de ressorsas.
Per ansin, los cercaires qu’estudièron aquel novèl e inquietant fenomèn medical mondial demandan de solucions globalas mai que regionalas. Pasmens, tanben avertisson que, se los primièrs antibiotics balhats foncionan pas, çò de normal es de ne poder pas aver d’autres mai rars pr’amor de la pauretat de maitas regions africanas. E çò de meteis se passa en d’autras parts del mal nomenat Tèrç Mond.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
