Lo dioxid de carbòni en l’atmosfèra de la planeta arribèt al nivèl mai naut de la siá istòria, malgrat la pandemia mondiala de la COVID-19. De remembrar que los nivèls comencèron a èsser registrats ara fa 63 ans. Pr’amor d’aquò lo Burèu Nacional de l’Administracion Oceanica e Atmosferica dels Estats Units (NOOA) avertiguèron quò èra un nòu dangièr sul clima de la planeta.
Per ansin, en mai de 2021 lo nivèl de dioxid de carbòni, tanben conegut coma CO2, en l’atmosfèra de la planeta arribèt fins a 419 parts per milion (PPM) aprés crosar la barrièra de 417 ppm en mai de l’an anterior. E malgrat que, tradicionalament lo mes de mai es lo mes amb mai d’emissions de dioxid de carbòni, los scientifics alertèron sus l’epòca qu’aquò se debanèt, pr’amor que se passèt pendent la pandemia de la COVID 19 e doncas los nivèls deurián èsser pas tan nauts.
Un recòrd confirmat
Aquel nivèl recòrd foguèt trapat e confirmat per de cercaires estatsunitencs dempuèi l’Observatòri Mauna Loa, en Hawaii, que contraròtla dempuèi l’an 1958 los nivèls d’emissions mondialas de dioxid de carbòni dels umans sus l’atmosfèra de nòstra planeta. A mai d’avertir sul dangièr climatic qu’aquel nòu e naut nivèl de CO2 pòt dubrir en la Tèrra, la NOAA tanben volguèt remembrar qu’es un nivèl que la nòstra planeta i aviá pas arribat dempuèi fasiá milions d’annadas.
La Redaccion
