ERA AIGUA QUE VENGUEC DETH SOLEI

Qu’ei un descorbiment susprenent: ua part dera aigua que i a ena planeta Tèrra a coma origina eth pròpri Solei. Açò ei eth resultat deth darrèr estudi hèt sus era origina deth liquid element ena planeta blua. Segontes semble aurie arribat sus asteròides que dempús arribèren ara Tèrra des der espaci exterior. Er estudi siguec publicat ena revista scientifica online Nature Astronomy.

Atau, er estudi confirmèc que siguec eth pròpri vent solar eth que provoquèc era creacion d’aigua en es asteroïdes que i auien en espaci e que dempús arribèren ara Tèrra. Era origina d’açò serie donques eth pròpri Solei pr’amor qu’eth pròpri vent solar que gessie deth Solei auie ions d’idrogèn, que sigueren es que provoquèren era creacion d’aigua dempús sus aguesti asteròides.

“Era Tèrra ei ua planeta damb fòrça aigua, çò diguec Phil Bland, director deth Centre de Tecnologia e Sciéncia Espaciau dera Universitat de Curtin, en Austràlia. N’i a fòrça mès qu’en d’autes planetes rocalhoses deth Sistèma Solar. Es oceans son mès deth 70 % dera superfícia dera Tèrra e es scientifics voleren tostemp coneisher era sua origina.

Era teoria tradicionau

“Segontes ua teoria tradicionau scientifica era aigua que i a aué ena planeta Tèrra arribèc damb asteròides deth tipe C, çò contunhèc Bland. Totun, un estudi hèt d’aquesti tipe d’asteròides demostrèc qu’aquera non ère era origina dera aigua que i a en nòsta planeta”.

Pr’açò ua còla de cercaires volec descorbir era sua origina. Damb aguest nau estudi era origina ei eth pròpri Solei que, damb era ajuda deth vent solar, amièc ions d’idrogèn que dempús creèren aigua en d’auti asteròides. Entà descorbi’c Bland e d’auti scientifics analizèren ua grana der asteroïde Itokawa, trapat pera nau espaciau Hayabusa en 2010 e que dempús tornèc entara Tèrra. Segontes aguesti cercaires en pòques granes i auie pro aigua, e se auéssem 1 m3 d’arròca d’aguest asteròide i aurien enquia 20 litres d’aigua, e açò ei fòrça aigua. Mès eth descorbiment sonque podec èster hèt damb era ajuda des naues tecnologies.

 “Ei un descorbiment sencacionau pr’amor que podèm atau conéisher eth passat dera nòsta planeta e tanben podem preparar futures missions espaciaus, qu’ara poden saber on trapar aigua, çò diguec Luke Daly, scientific dera Universitat escocesa de Glasgow. Es astronautes poden ara saber on trapar aigua en espaci e damb aguest descorbiment auem trincat ua des barreres dera exploracion espaciau”.

 “Pr’amor qu’ara sabem qu’aqueth procés de creacion d’aigua tanben passèc en d’autes planetes que dilhèu non an ua atmosfèra, mès que poden auer aigua, çò afirmèc Daly. E açò poirie èster ua grana ajuda entàs astronautes pr’amor qu’ara ja saben on poden trapar aigua en espaci en d’autes planetes, coma ena Lua”.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita