E ARA LO SOLELH
Après capitar d’enviar una nau espaciala sus la Luna e d’i poder pausar un engenh sus lo nòstre satellit terrèstre, Índia vòl ara arribar amb una nau espaciala lo mai près possible del Solelh per l’estudiar amb prigondor. Se capitèsse plan, Índia seriá lo primièr estat asiatic de la planeta qu’a pogut plaçar una nau de recèrca espaciala a l’entorn del Solelh.
Es per aquò qu’Índia mandèt una nau espaciala lo 7 de setembre passat vèrs lo Solelh. L’operacion foguèt un bèl succès e ara, après plusors jorns de viatge, es estat confirmat que la nau Aditya-L1, Solelh en indi, contunha plan son viatge vèrs l’estela del Sistèma Solar. “Cal felicitar los nòstres engenhaires e scientifics, çò diguèt lo primièr ministre indian Narendra Modi, tanlèu conéisser la reüssida espaciala de son país. Sonque aital podèm plan melhor saber cossí agís l’Univèrs”.
Una mission tanben scientifica
La mission que deuriá arribar a l’entorn del Solelh es una mission scientifica provesida d’instruments scientifics qu’an per tòca de poder estudiar la part extèrna de l’estela. Los cercaires an confirmat que la nau espaciala indiana atenheriá pas l’orbita del Solelh abans quatre meses.
D’autre caire, los Estats Units e tanben l’ÈSA, l’Agéncia Espaciala Europèa, tanben desvolopan un programa especial per estudiar lo Solelh dempuèi d’annadas. Dins los ans 1960, lo programa Pioneer de la NASA ja aviá enviat una nau espciala près del Solelh. Mas ara es lo primièr còp qu’un país coma Índia o pòt far. D’autres estats de la planeta, coma Japon e China, an tanben mandat de naus espacialas per poder melhor estudiar lo Solelh. Totun, la lor orbita es sonque terrèstra.
S’Índia pòt capitar e, fin finala, plaçar una nau près de la nòstra estela, serà lo primièr còp qu’un estat asiatic o pòt far. Per ansin, la mission vèrs lo Solelh es estada classificada coma plan ambiciosa. “Mai encara per Índia, çò diguèt l’astrofisician indian Somak Raychaudhury”. Segon aqueste cercaire, la nau espaciala indiana estudiarà las ejeccions de massa coronala solara, que pòdon entraïnar de problèmas de foncionament dels satellits terrèstres.
Segon los indians, la nau espaciala Aditya ajudarà doncas a avertir la planeta sus quora se pòt produire aquel dangièr, e a poder crear un sistèma d’alèrta mondial per prevenir de damatges solars suls satellits o encara sus las comunicacions del Mond. La nau Aditya a encara un camin de mai d’1,5 milion de quilomètres abans d’aténher l’orbita solara. Aquò es sonque un 1% de la distància que i a entre la Tèrra e lo Solelh. E arribarà a un luòc ont la fòrça gravitacionala dels dos còrses espacials s’anulla, e aital la nau prendrà una orbita agradiva a l’entorn de l’estela.
La fusada que quitèt la Tèrra pesava mai de 320 tònas, e la mission tanben vòl descobrir cossí se tenon de fenomèns espacials, dont la dinamica del Solelh. D’estudiar las particulas de la nauta atmosfèra solara es una autra de las tòcas màgers.
E tot aquò amb plan mens d’argent que d’autras missions europèas o estatsunidencas. Lo budget espacial indian es plan mai reduch que lo d’autres estats malgrat que siá un pauc pus naut dempuèi l’an 2008, quand Índia assagèt de plaçar una sonda a l’entorn de la Luna.
L’aluniment indian de 2023 situèt Índia al costat de Russia, dels Estats Units e de China dins lo club de las poténcias lunaras. Lo viatge costèt mens de 75 milions d’èuros e foguèt plan celebrat pels indians. Ja en 2104 Índia aviá pogut far orbitar una nau a l’entorn de Mart, e la tòca es d’enviar una mission amb d’umans en 2025. D’autras missions indianas serián de mandar una sonda tornarmai sus la Luna en 2025 e una autra près de Venus en 2033.
Un article de Christian Andreu
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
