ESTONAMENT MONDIAU: QUE REVISCÒLAN LO LOP TERRIBLE PREÏSTORIC
La comunautat scientifica tornèt a obrir la discussion pr’amor de la resulta de la manipulacion genetica de divèrsos lops grises que balhèron pas a la naissença de tres pichons lops terribles (Aenocyon dirus). Segon l’entrepresa de Tèxas Colossal Biosciences qu’o realizèt, aquò es la desextincion d’aquela bèstia preïstorica après 10.000 ans. La meteissa entrepresa confirmèt la naissença de tres lobatons manipulats geneticament. Pasmens, l’anonci de la naissença dels tres lobatons entraïnèt lo començament d’un gran debat scientific sus las consequéncias eticas e biologicas de l’afar. E pas totes los cercaires dison qu’es una desextincion mas la creacion d’una espècia nòva.
Aital, l’entrepresa de biotecnologia Colossal Biosciences confirmèt la naissença tornarmai, d’una espècia escandilhada fa 10.000 ans. Foguèt confirmada la naissença de tres lobatons modificats geneticament. Los lops an los nòms de Romul, Rem e Khaleesi e son considerats per aquela entrepresa los primièrs especimèns vius d’aquela espècia preïstorica ; lo lop terrible.
Per poder aquò far, lo projècte se basèt en l’analisi entièra del genòma del lop terrible, qu’arribèt de la man d’una dent de 13.000 ans d’edat e un tròç d’aurelha d’un especimèn d’aquela espècia e que visquèt fa mai de 72.000 ans. Après rebastir lo genòma d’aquela espècia, los cercaires de Colossal modifiquèron las cellulas de lop gris (fins a 20 cambiaments en 14 gèns clau) per poder aital aver las caracteristicas geneticas del lop terrible. Puèi foguèron desvolopats 45 ovuls modificats e foguèron creats tres embrions de lop que foguèron implantats en dos cans femelha.
Una creatura terrible
Lo lop terrible foguèt una espècia canida que demorèt en America pendent lo Pleistocèn. Podiá arribar plan a far 100 kg de pés e aviá un cors plan fòrt, mòrre long e una maissa que podiá trincar òsses. Segon mai d’un cercaire, aviá lo ròtle actual de las iènas, çò es depredar e manjar de carronha. L’espècia s’escandilhèt fa 10.000 ans pr’amor del cambiament climatic e la fin de las grandas predas qu’atacava.
Aquesta operacion seriá una mai del programa « Desextincion » que tamben a còma tòca la tornada del mamot (escandilhat pendent l’epòca dels romans) e lo tigre de Tasmània (escandilhat en 1936). Segon Colossal Biosciences, aquò ajudarà a restuarar d’ecosistèmas en declin e ajudar a aver una mèger biodiversitat. Pasmens, aquò obriguèt un nòu debat en çò dels scientifics pr’amor que fòrça d’aqueles dison qu’aquò es pas una vertadièra desextincion mas la naissença d’una nòva espècia de canid modificat geneticament. Car los cercaires modifiquèron sonque 20 gèns e un mamifèr ne pòt aver mai d’un million. En mai d’aquò, dison que poiriá cambiar l’ecosistèma actual e que los mateisses nòus lòps poirián pas d’adaptar plan al mond actual.
Pasmens, Colossal Biosciences considèra que lo projècte es istoric e que la genetica, après aquò, serà pas jamai la meteissa. Fins auèi lo jorn l’entrepresa diguèt pas quan pensa introduïre aqueles tres lops terribles a l’environament e confirmèt qu’uèi, encara son barrats e contrarotlats scientificament.
La Redaccion
